絲絲講場：睇盡超豪科企總部打卡位
科技巨企豪掟錢建總部，鬥獨特，結果近年畀世界各地遊客攻陷，成打卡點。絲絲現帶團「科企總部深度體驗一日遊」，行程三個景點，即日來回，唔使逼「金巴」，小費隨緣！
Apple飛碟形大樓夠科幻
第一個景點就係位於美國加州丘珀蒂諾（Cupertino）嘅Apple Park（蘋果園）。呢「幢」Apple Inc.（蘋果公司）總部，嚴格啲講唔叫得做「幢」，事關係飛碟形，面積280萬方呎，「外牆」全部係弧形玻璃，設計出自建築師行Foster + Partners，即係設計香港滙豐總行嗰位Norman Foster。大樓外面仲有見唔到盡頭嘅大片草地、樹林、果園……Sorry，呢啲通通不對外開放。
不過放心，佢哋安排咗個「旅客中心」，個「懸浮」屋頂夠晒閣下打卡，仲有大把Apple產品等你買餐飽。
接下來就係位於美國三藩市嘅Salesforce Tower。呢幢係三藩市最高嘅摩天大樓，打卡位係最高嗰9層外牆嘅1.1萬顆變色LED燈裝置，出自當代藝術家Jim Campbell。不過幢大樓唔係企業雲計算公司Salesforce嘅，佢哋只係租咗近半樓面來做總部。
佢哋總部有10呎高玻璃採天然光，每層設有「冥想室」，準備枕頭畀員工坐喺地慢慢沉思。Office最特別之處，係冇飯堂，公司話鼓勵員工落街食Lunch喎！
Fb使31億建七彩MPK 20
最後係Facebook（Fb）豪掟4億美元（約31.2億港元）打造嘅新總部MPK 20，位於美國加州門洛帕克（Menlo Park）一片22.6萬平方米上。MPK 20由建築師Frank Gehry設計，司徒拔道幢螺旋形嘅傲璇就係出自佢手。
MPK 20外面睇係玻璃同鋼，裏面就七彩，藍色牆、橙色走廊……講得出嘅顏色都有。屋頂係空中花園，種咗超過400棵樹，仲有半英里步行徑。
Fb講咗話會喺隔籬再擴建多個「Willow Campus」，會有蔬菜店、藥房同社區設施，仲有1,500個住宅單位，直頭一個鎮咁！當中15%住宅會以低市價出租，益埋公眾，預計四年後落成，到時絲絲再帶大家去睇樓！
余絲韻