Market Insight：人民幣續軟 避開受累股

兗煤出季績見光死

睇睇板塊表現，昨日就見煤炭股同汽車股跌勢加速，前者受累於兗州煤業（01171）第三季度盈利大幅倒退，按內地會計準則，期內盈利按年大跌28%至11.63億元人仔，股價大跌16%報7.35元，成支大陰燭插落去，睇見唔開胃！同業中煤能源（01898）及中國神華（01088）就分別跌4.7%及3.9%。雖然話早前板塊相對大市硬淨，但如今勢頭轉差，短期都係放埋一邊。

至於古勝經已唔睇好的汽車股，則因長城汽車（02333）上季盈利大跌近五成，股價幾乎由頭跌到尾，最終插8%報4.09元。其他汽車股普遍唔靚仔，人氣較旺的吉利汽車（00175）及比亞迪股份（01211）分別跌2.7%及1.9%，作為中美貿易戰主要受累股，真係無得搞。

另外，市場睇死人民幣好快穿7算，雖然中國上周五出口術維穩匯價，但人仔昨日繼續偏軟，在岸價（CNY）及離岸價（CNH）皆一度跌穿6.96關。部分內需股話就話受貿戰影響較微，但仍受人仔貶值影響，好似維達國際（03331）近日公布第三季經營溢利急跌五成，股價昨日先跌後回升，即市走勢甚為波動，睇怕最靚的短期高位已一瞬即逝。

維達經營壓力大增

睇番集團首三季經營溢利微增1.2%至7.69億元，其中第三季盈利大跌50%至1.25億元。維達表示首九個月面對多項挑戰，其中最受影響為大幅上升的木漿成本及人民幣兌美元貶值。

雖然集團指出為緩解有關壓力，已採取多項措施如兩輪提價、節約成本及優化產品，但人仔貶值勢頭延續下，未來經營環境仍存變數。即使短期有得彈，睇怕都係彈散居多，若仍有貨在手，都係趁反彈沽貨為佳。

古勝