Market Insight：炒車股要跟貼 比亞迪值博

雖然市場上對今次反彈市睇法各異，例如有人話回補埋早前下跌裂口先講；亦有人話係技術反彈，唔好衝動；惟又有人話港股今年底部已見，要大手入貨。古勝一向認為，真金白銀最能反映市場睇法，順勢而行便可。

走勢上，恒指差39點先回補到上次的下跌裂口，但事實係港股以十月十九日低位25,090點升至昨日高位26,234點，兩個交易日升咗千點，強勢顯現。

國壽有勢突破阻力

值得留意的是，國指於十月十一日低位為9,975點，而此位剛好貼近一六年初至今年初調整幅度的0.618約9,967點水平，即港股未來受A股帶動向上的機會確唔細，似乎此刻即使唔入市博反彈，都唔係一個逢高建淡倉的時候！

反之，假如港股短期唔再大跌，咁即係會出現兩個可能：橫行或大彈。前者，由於現時恒指已處下降通道較下方位置，從日線圖睇上方阻力約27,600點，故未來只要守穩前低位25,090點支持，可逢低吼心水股短炒上落。

至於後者，博大幅反彈的話，則應以權重及受惠國策的板塊龍頭股為主，例如中資金融股相信會係國家隊撐市的主要目標，除昨日提及的建行（00939）外，若然內地氣氛轉好，其他內險股亦應受惠。

中國人壽（02628）股價九至十月在16.5元水平營造小雙底回升形態，昨日升3.3%報17.82元，繼早前上破10天線後進一步上破20天及50天線，短期若能在大成交配合下上破雙底頸線約18元阻力，應可更上一層樓，目標上望19.5元，跌穿10天線約17元止蝕。

此外，早前氣氛偏淡的汽車股亦借勢炒一轉，其中一向鑊氣較濃的吉利汽車（00175）及比亞迪（01211）股價分別升7%及9.1%。惟要留意，汽車企業為中美貿易戰的主戰場之一，未來若在相關話題上有甚麼風吹草動，相信板塊亦會跌得較急勁，所以唔係唔炒得，不過就要夠貼市至好落場。

嚴控注碼 管好風險

若以圖論勢，兩者中以比亞迪稍稍秤先。比亞迪跌勢已喘定一段時間，短期若能進一步上破近幾個月主要阻力56.5元水平，則再上動力料轉強。考慮到昨日升幅不少，建議候破位才追勢，首站目標睇60元，中線睇65元，跌穿54.5元止蝕。

提多一次，早前困擾中港兩地股市的不明朗因素如中美貿戰、人民幣貶值、內地走資潮等皆未有解決，且今轉反彈市以「人為因素」為主，所以博反彈者應嚴控注碼以管好風險，而部分板塊前景難以言好，例如券商股受累內地經濟以至股市基本面仍弱，故最緊要係揀啱板塊！

古勝