絲絲講場：東京拍賣主席苦學日文發達

講開先知，原來佢係土生土長華人，本名廖湘桂，只係十八歲就飄洋過海去咗日本讀書，之後仲扎埋根入籍日本。

佢回想當年喺內地讀高中時，人人都選修一門外語，佢自覺英文半桶水，就揀學日文，估唔到用咗一晚就背熟晒日語五十音添。

借字典1周 抄二千詞彙

不過，當時日文字典都唔係咁易擁有，難得日文老師肯借畀佢，但只借一星期，於是佢就用呢一星期將成本字典二千幾個詞彙全部手抄一次！

咁點解會入行做藝術品進出口？佢話，當年隻身去日本讀大學，生活唔容易，咁啱媽媽本身係開文房店嘅，就諗住喺當地賣文房四寶賺下生活費，賣下賣下就認識到好多書畫家、收藏家，結果就開始咗做貿易生意。

講到成立拍賣行，原來係因為佣金問題。當年佢透過唔少渠道賣古玩，當中包括雅虎日本同樂天等網上平台，不過人家收費愈來愈貴，所以佢索性自己做收佣金嘅中間人。

安藤先生話鑑於職業道德，即使遇到心頭好，拍賣行從業者都唔會參與買賣，費事同客戶構成競爭。不過佢又話，拍賣品正式賣出前起碼會喺佢哋手大概三個月，都算係「曾經擁有」吧！

余絲韻