孖妹S檔案：學炒恐慌指數 Chok市唔使慌

基礎知識 VIX愈高 市場愈不安？

Kitty：炒股市波幅具體嚟講即係點？

彩兒：VIX係芝加哥期權交易所（CBOE）波動指數（Volatility Index）嘅簡稱，根據標指期權價格計算得出，用嚟預測標指喺未來30日可能出現嘅波幅。當VIX愈高，反映投資者預期後市波動程度愈高，以及大家不安嘅心理狀態，所以市場常把VIX稱為「恐慌指數」。

港版指數具參考價值

蔡：若有炒開期權，熟悉引伸波幅，即市場對現貨價格未來波幅嘅預期，炒VIX就易上手。

Kitty：「恐慌指數家族」仲包括乜？

蔡：有VXV（CBOE S&P 500 3-Month Volatility Index）、VIN（CBOE Near-term VIX Index）等指數。謹記，市況方向同波幅升跌無關。

Kitty：我識。市大跌，正股輸，但VIX都可賺。

彩兒：VIX期貨喺美國流行，香港VIX期貨活躍嗎？

許：恒指波幅指數（VHSI）係恒生指數（HSI）及股票市場嘅波幅指標，以芝加哥期權交易所波幅指數的計算方法為基礎。然而，香港VIX產品無莊家，流通量唔高，冇咩投資者會買。

不過，佢都有參考價值，早排港股成交額超過1,000億元，但恒指上落僅逾100點，屬於牛皮格局，但如果牛皮格局維持多過五個交易日，相信佢哋波幅好快會增大，隨時大升或者大跌，投資者就可以估方向，做相應部署。而美國VIX更有參考價值，因為投資者較成熟，亦有莊家，所以產品買賣差價會相對窄，減低投資風險。

美國VIX指數近期走勢	耀才許繹彬表示，香港VIX產品無莊家，流通量不高。	香港程式交易研究中心蔡嘉民指，不少共同基金會買VIX期貨護倉。

炒法分析 睇市波幅部署長短倉

彩兒：不如講解吓VIX各種炒法吖！

蔡：最簡單可以炒對市場預期，如果覺得波幅會變大，就買VIX期貨/VIX ETP長倉；相反覺得波幅會變小，就買短倉。進階炒法可以炒跨期，例如跨期套戥。因VIX期貨會到期，VIX期貨同VIX指數價格要一樣。若仲有幾日就到期，但VIX期貨價格依然比VIX指數高幾個指數點，就可以做套戥。做個VIX option long strangle（勒束式長倉期權策略）/long straddle（馬鞍式長倉期權策略），就好似買緊VIX指數，然後再沽空張VIX期貨。

期貨入場十萬元有找

Kitty：做套戥，成本效益如何？

蔡：美國VIX產品非常流通，成交額好多，VIX期貨買賣差價可以低至0.05個指數點，所以相比幾個指數點套戥，不足掛齒。另期貨同期權都無印花稅。至於入場門檻，一張VIX期貨，十萬元有找。有部分證券行更有優惠，例如同時沽期貨及買期權認購證，都係十萬元搞掂。

彩兒：好，你仲有無其他招式？

蔡：當然有。期貨隨住時間一路過，一路有折讓。且期貨期限結構，有唔同月份到期，而期限愈長，期貨價格一般就會愈貴，呢個現象亦叫升水。沽空近期，買入遠期，例如沽十二月，買下年三月，只要一路升水，就會賺錢。

Kitty：咩時候最啱炒波幅？

蔡：依家波動市，係幾啱！唔少共同基金都唔沽得貨，佢哋都會買VIX期貨保護個倉。而且VIX易玩啲，因為VIX好少會郁得好勁，今個月大升，下個月大跌，再下個月又大升；而且VIX一般喺區間，若跌到10，好大機會向上；而升到50，又大機會下跌。但市況就唔係，佢可以好Chok。

彩兒：難怪，見美股可以升逾十年，但VIX唔會。不過提一提，凡事有例外，例如喺○八年金融海嘯，VIX高位超過80。

ETP產品 助對沖正股 成本較低

Kitty：咁多VIX產品，點解獨愛其ETP（Exchange Traded Product，交易所買賣產品）？

Jimmy：我揸住唔少美股，但預計美股短期會回調，所以買定VIX ETP，短線對沖逾三成正股，萬一跌市，都無咁傷。

彩兒：點解只宜短炒？

蔡：VIX指數ETP追蹤VIX期貨，惟期貨有到期日，ETP為期貨轉倉時，就會令其減值。

Jimmy：投資風險亦相對細，無槓桿，且較買期貨嘅投資成本低。玩VIX而非VHSI，因仲未有VHSI嘅ETP，VHSI本身流動性低，所以唔諗住。

Kitty：我知市場有炒VIX升嘅ETP，包括VXX及UVXY，同埋做空VIX嘅ETP，即XIV。

蔡：就好似盈富基金（02800）追蹤恒指，以上嘅ETP都用嚟追蹤VIX期貨。

彩兒：直接沽貨咪唔使煩囉？

袁：如果係我，我都可能直接沽貨算，唔使畀更高交易成本，又唔驚滑價，即買賣嘅價格同預期掛單嘅價位唔同。

蔡：博VIX跌，就沽VIX期貨，但一旦VIX大升，你就傷亡慘重，所以買反向VIX ETP，就可以控制損失，輸極有限。

Jimmy：我無對沖晒，且長線睇好美股。聯儲局持續加息，資金回流美股，且美企整體盈利能力強。雖月初有美國科網股累美股大跌，但部分美國科技股前景看俏，我有買Alphabet、Apple及Amazon，但估Netflix及Tesla前景會差啲。

散戶Jimmy稱，長線看好美股。

港大袁志樂稱，賭波幅比買個股賭方向容易。

期貨期權 兩者都炒 助提高勝算

袁：我唔揀VIX ETP，因為買期貨及期權都可以做到對沖作用。

Kitty：買VIX期貨及期權，有咩分別？

蔡：VIX期權係進階版。

袁：我兩樣都會炒。如果預計VIX下跌，我會沽VIX期貨。如果預計VIX上升，我會買VIX認購期權長倉，因其爆發力強，可做到以小博大，而且回報高。如果預計VIX上升，買期貨就會蝕高水。月初美股突然急跌，VIX都升咗，而我有買VIX認購期權長倉，揸咗一日平倉，賺幾千蚊。

彩兒：你嘅投資策略係點？

袁：我發現美股好多時都維持低波幅，所以逢高沽VIX期貨，都會有利可圖，但既然甚少出現高波幅，所以入市機會唔多。另外，好多時期權引伸波幅上升，指數波幅都會上升，而呢個信號較為常見，所以我每隔兩三日就入市，如果值博嘅話，用Long Strangle策略，買認購及認沽期權令對沖值變成零，期權價格對相關資產價格敏感度變零，做到市場中性，唔估方向，平均都賺三成。

留意時間值損耗風險

Kitty：咁筍？有冇風險？

袁：當然有，除咗係低波幅嘅風險外，期權亦有時間值損耗，每過一日，認購或認沽期權持有者受到價格下跌嘅損失。另引伸波幅跌，亦會導致虧蝕。如果引伸波幅低於歷史波幅，即指數回報率喺過去一段時間嘅標準方差（Standard Deviation），咁期權價就有折讓。

Kitty：做決定做得慢，都要付出代價，慘！

袁：相比買個股賭方向，我覺得賭波幅易啲喇。另外，我估計中港股會轉勢，港股會逐漸弱過A股，所以好快可以做套戥賺錢。

彩兒：港股自二月陰啲陰啲跌，你哋有冇縮減投資額？

袁：投資額無縮，反而因波幅大啲，市場出現恐慌及不理性嘅投資，有錯價，咁入市信號就會多咗。

Kitty、彩兒