港股近期隨A股每況愈下，中資上市企業佔港股比例巨大，繼而受人仔貶值的負面影響同樣大。市場淨係「重估」在中資股因人仔貶值所受的盈利損失，已令港股市值失分不少。
更何況，中美貿易戰對各行各業影響逐漸顯現，好似汽車股除面對美國加大關稅的同時，中央又加大行業對外資開放程度，好似華晨中國（01114）失去咗華晨寶馬合營控制權，股價似食咗瀉藥咁，八月及九月貼近13.6元水平營造雙頂後已走晒樣，上周五大跌裂口失守10元關後，資金當然有沽冇買，昨日再插7.3%報7.32元，個零月已累跌46%，仲有邊個夠膽買呀！
最慘係，行業前景差的唔止得一個板塊，好似手機設備股今期就受九月內地手機市場出貨按年跌逾一成影響，瑞聲科技（02018）昨日急跌7.6%，舜宇光學（02382）雖升0.1%，但查實係之前已跌定先，加上股價失守紅底股後走勢逆轉，上周低見69.25元終現反彈，但考慮到基本面未見改善，相信係技術反彈居多，睇怕板塊都要靜一輪。
既然內地手機銷售數據差，咁小米集團（01810）就更加無運行，唔好話要好似集團主席上市之初講過要令股價翻倍，現時就連上番招股價都難。
睇番小米基本面唔算太差，起碼上市後已交出一份亮麗成績表，中期虧轉盈賺76.5億元人仔，收入增長又勝預期，可惜港股氣氛唔就，加上美國科技股有轉弱的迹象，就連騰訊（00700）等龍頭都出現拋售潮，只能嘆句生不逢時！
古勝