絲絲講場：外傭理財班僅25%畢業

學習免受財務剝削

會計師行畢馬威嘅慈善基金早排贊助為期一年財務知識課程，專為外籍家傭而設，吸引咗315名外傭參與，其中得79名學員（即25%）可以順利畢業，證明個課程唔係玩玩吓！過去嘅周日，仲喺港交所嘅香港金融大會堂搞畢業禮添！

畢馬威中國企業社會責任主管合夥人吳柏年話，部分外傭教育水平較高，喺家鄉亦可能有投資理財經驗，但部分身處異鄉時易受不法中介費等財務剝削，對貸款或簽作擔保人嘅風險未必太了解。而呢個課程旨在為佢哋提供全面、客觀持平同可靠嘅投資資訊。

課程內容包括了解儲蓄、定期存款及往來帳戶、股票、子女教育同房地產（住宅同農地）投資等，共16節課堂（英語同印尼語各8節），每節兩個鐘。

學員實戰 炒科技股

呢一年除咗工作之餘仲要上堂，係咩驅使外傭姐姐咁勤力？學員之一來自印尼嘅Ros R就話，課程非常實用，亦改變咗佢對短期與長期投資嘅取向。佢仲自爆有實戰，買咗啲環保科技股票添！

總括嚟講，參加完呢一系列課堂後，有97%學員話明白咗投資風險。查實個課程真係好吸引，唔知幾時有下次呢？

余絲韻