絲絲講場：債王格羅斯失威慘變「郵票王」

曾號稱「債券大王」嘅格羅斯（Bill Gross），近年主業勁唔掂，佢管理嘅基金上半年勁蝕1.53億美元（近12億港元），跑輸同業，「債王」個皇冠已甩皮甩骨，今時只剩番「郵票王」個朵。

佢嘅郵票藏品相當厲害，其中幾張上周喺公開拍賣以破紀錄一千萬美元（約7,800萬港元）售出，當中包括一套一八六九年發行的24美仙郵票，郵票中間圖像上下倒轉，絕對係極罕品，拍賣收益全數作慈善用途。

呢啲只係佢珍藏嘅冰山一角，佢九二年開始儲郵票，收埋唔少價值連城嘢，珍藏估值至少3.3億港紙，堪稱「郵票王」。

不過呢幾年佢可算流年不利，不斷「分手」。一四年佢成70歲人先權鬥失敗，被自己幾十年前創立嘅太平洋投資管理（Pimco）逼走；結婚幾十年嘅老婆一六年亦同佢離婚，連兩人同寢一室嘅畢加索名畫早被老婆換走埋，佢都唔知。

講到佢喺Pimco嬲住劈炮後，仍唔肯收山，寧願走去駿利屈就，管個Size得番佢老人家以前Run開嘅1%都冇嘅基金，無非係想話畀全世界知四個字：我‧仲‧好‧掂！

可惜大家見到嘅，係另外四個字－「晚節不保」。佢喺駿利管理嘅基金「Global Unconstrained Bond Fund」，今年五月底竟試過一日蝕3%，令市場矚目，事關股價一日跌3%未必係啲咩，但債市嚟講就係災難。

當時啲行家直頭話佢，今次一係槓桿率過高，一係就完全睇錯市，仲有人寸話「好一個Unconstrained（不受拘束）嘅全新定義」咁話。

個基金嘅回報由年初至今已跌咗逾6%，仲不斷遭投資者贖回，基金資產由年初至今大縮47%。

格羅斯依家嘅老細駿利CEO Richard Weil八月中就公開話「格羅斯仍然未對自己嘅基本觀點失信心，不過佢錯咗，短期計錯得好惡劣」，仲話格羅斯要負責添。呢鋪唔通真係天人五衰，唉！

余絲韻

絲絲講場：債王格羅斯失威 慘變「郵票王」