絲絲講場：馬斯克15推文炸證交會
電動車生產商特斯拉（Tesla）舵手馬斯克啱啱先同美國證交會（SEC）就欺詐指控達成和解協議，點知佢周四喺美股收市後連環喺Twitter發文，5個鐘內發15個推文，仲改SEC花名，叫Shortseller Enrichment Commission「空軍後援會」。
變本加厲 累Tesla蒸發143億
Tesla股價周五早段最多挫3.83%，至271.05美元，以此推算市值蒸發18.41億美元（約143.5億港元），除番開即係每條推文揣毀1.22億美元嘅股份價值。
睇番馬斯克周四嘅推文，佢語帶諷刺咁話「空軍後援會嘅工作做得極好，改呢個名真貼切。」；然後有追隨者擔心佢做法不利投資者，佢就回應「如果你係真正長線投資者，放心無事嘅！」
馬斯克八月七日發推文話就私有化取得融資，畀SEC指控誤導投資者同違反證券條例。雙方上周六達成和解，馬斯克同Tesla都要畀罰款，佢亦要放棄擔任主席三年等，和解仲要等聯邦法官批准至落實。有人話馬斯克嘅做法等於向SEC挑機，擔心和解有變數。
余絲韻