絲絲講場：李小加變作家寫金融大時代

冀為內地做3件事

佢喺本書自序中講到，過去香港為內地做咗三件大事，包括轉口貿易、直接投資及資本市場發展，成績有目共睹。不過，時移世易，香港要與時並進，未來香港要做好嘅三件事，就係幫助內地人財富實現全球配置、幫助中外投資者喺離岸管理在岸嘅金融風險，同埋幫助中國實現商品及貨幣嘅國際定價。

由於事關重要，佢希望透過深入淺出嘅文字寫網誌，嚟個「拋磚引玉」，藉此匯集更多寶貴嘅市場意見，經過多年下來，已經儲咗好多「磚」，所以將它們結集成書。

佢本大作有六大章，有齊中英文版，所以好似字典咁厚，而且係硬書皮精裝，賣成248元o架！但相信小加總裁嘅「粉絲」們應該唔會嫌貴，仲會留為珍藏，搵佢簽埋名添！

不過，有人就開玩笑話，唔知有幾多金融界人士會鍾意收「書」？輸輸聲，唔好聽嘛！

余絲韻