絲絲講場：馬斯克唔驚罰再寸證交會

話說佢八月喺Twitter講大咗，有關佢發貼時神志點、係咪關冧女事等傳聞，金融界同娛樂界已滿地花生。周六終於話和解，佢同公司唔止要畀天價罰款埋單，仲限佢45日內辭去主席一職，只可留任行政總裁。

呢頭告一段落，嗰頭馬斯克周一就喺Twitter度Post隻Hip-Hop歌《O.P.P.》嘅MV。擺明用隊Hip-Hop組合個名「Naughty by Nature」，借題發揮話自己天生唔理規矩，向證交會示威。

再發推文爆「盈利預測」

不過咁喎，O.P.P.亦可代表「Operating Profit Positive」喎！暗示公司終於有錢賺？喂喺Tesla翌日正式出第三季數據前，又再踩界事先張揚業務敏感資料咁夠膽？

明顯證交會亦怕咗馬斯克亂爆Seed嘅脾氣，所以和解協議要求另搵人頂佢個主席位，再任命多兩名獨立董事去「監督」住佢，有傳廿一世紀霍士公司行政總裁傑智（傳媒大亨梅鐸個仔）係新主席人選。不過市場認為，以馬斯克嘅霸道法，睇怕新安排都管佢唔住，一唔順佢意，怕佢即劈炮連CEO都唔撈咁話。

至於佢憑歌寄意隻《O.P.P.》，原曲係講男女「偷食」，「O」字係「Other」，「P」字係「People's」，最後一個「P」字就……絲絲為人矜持，梗係話「Property」啦，唔係你話仲會係乜呢可？

余絲韻