今次呢件山竹的威力強得實在嚇人，不單止無數大樹連根拔起，全港交通陷入癱瘓，就連港股都吹跌埋。但講真，市場最擔心美國總統「侵侵」隨時宣布對2,000億美元中國貨品加徵關稅，所以港股先跌得咁甘！
幾隻指標股昨日全面向下，股王騰訊控股（00700）、港交所（00388）、中國移動（00941）及建設銀行（00939）的跌幅介乎1.1至3.2%不等，其中騰訊跌穿320元，短期若彈唔番上昨日高位326元，已追貨博反彈者應忍痛止蝕，以免因小失大。
昨日人民幣兌每美元中間價報6.8509，較上日開市價回吐147點子，雖然話三大中資航空股昨日只係個別發展，中國國航（00753）及南航（01055）分別跌0.4%及1.2%，反而東航（00670）升0.8%。然而，考慮到人民幣中線貶值機會仍大，加上油價又隨時受「侵侵」出口術影響，板塊前景仍存變數，都係掂唔過！
「果迷」等咗好耐的新iPhone上周終登場，惟見iPhone Xs首個周末預售情況似乎未如想像般熾熱。加上中美貿易戰又再度埋牙，所以上周尾段兩隻有得升的手機設備股瑞聲科技（02018）及舜宇光學（02382），昨日都分別下跌5.8%及5.2%。
策略上，手機設備孖寶近期走勢與行業氣氛皆唔多好，後市似乎都係易跌難升。睇番瑞聲股價呈一浪低於一浪，後市若跌穿75元支持宜即時止蝕。
至於舜宇，走勢就相對無咁差，八月中至今在83.2至105元橫行上落，未破位前可小注在區間內炒上落，惟一旦破位而落同樣要止蝕。
古勝