Market Insight：資源板塊恐再添政策風險

當然，喺超賣下，技術反彈隨時會出現，而市場總有人睇好同睇淡，好似野村早前份研究報告指，基於今年以來全球股市氣氛呈三十日一個周期的形態，以及部分季節性因素會令一些風險資產價格於九月尾回升，存在短期入市機會。

市場不再有強勢股

不過，大家要留意，周期只係按過往歷史表現推測出來，若然市場突然出現突發利淡消息或系統性風險，則周期長短隨時變。當然，這亦要視乎大家相信周期的程度有幾大。

講番熊市特性，就係整體股市級級落之餘，市場上更加唔會再存在強勢股，且反彈時間來得愈來愈短之餘，每次反彈動力亦愈來愈細，成交亦會因各板塊股份下跌而逐漸縮減，大家睇睇恒指走勢及成交就明白。所以話，如果看官手上持倉股份仲未跌，唔代表係硬淨，只不過代表佢「排隊等跌」。

鋼鐵及建材股就係最新例子，前者受累市傳鋼鐵業環保限產措施或放寬，市場擔心供應增加或令鋼價下跌；後者則因有內媒報道指，發改委將派員到相關協會對砂石、水泥、混凝土等建材價格上漲進行調查，市場憂慮行業政策風險升溫，故拖累板塊受壓。

馬鋼（00323）及鞍鋼股份（00347）昨日分別跌13.5%及9.3%；而亞洲水泥（00743）、西部水泥（02233）及海螺水泥（00914）跌幅則介乎3.9至8.5%不等。

要資金回流難度高

事實上，鋼鐵股早前表現大市較硬淨，主因業績表現良好。好似馬鋼上半年盈利按年增長1.08倍；鞍鋼半年盈利則增91.9%。可惜，當下市場氣氛就係一切，睇見板塊昨日沽壓沉重，短期要重新吸引資金進駐有一定難度。

至於建材股，受累政策風險因素，按過往經驗，除非當局澄清，否則一般唔會好快彈得番，尤其是現時身處熊市，都係眼看手勿動。

古勝