絲絲講場：公司潮文通告驚動小加
上月底有間上市公司中期業績內「業務回顧及發展」部分竟出現廣東話Crossover書面語，而且霸氣十足，絕對係篇奇文，一出金融界即瘋傳，市場人士無不嘩然！估唔到，篇潮文原來仲有下文。
港交所接投訴信
絲絲收到風，有六位立法會議員聯名去信香港交易所（00388）行政總裁李小加，投訴篇潮文無論中英文版都有文法錯誤，又話作為上市公司出埋啲政治內容令人困擾，希望此風不可長咁話喎。
篇潮文點奇法？話說一般上市公司業績，都會有「業務回顧及發展」呢部分，由公司管理層講吓市況大環境，公司本身業務等大路嘢，通常都文縐縐，亦即係較悶。
不過呢篇潮文一開場就「10年前美國狂印鈔票輸出全世界。現在美國與全世界為敵，要將輸出的美金和遷出美國的供應鏈搬師回朝。整冧別國的資產市場和全球供應鏈布局。」幾咁先聲奪人！
行文針對特朗普
行文跟住係「所以美國的敵人特別多」，又指「佢（美國總統特朗普）係打晒全世界」，「但要消滅美國這個霸主不容易，歷史上要踢走大佬，都是要冒上先被大佬打死的風險」，「但中國足智多謀」，仲指「以川普（即特朗普）的智慧，要整冧中國的模式，也不是係借火這麼容易。」絲絲直頭隔住個Mon，都Feel到位管理層嗰份霸氣同自信！
是否文法不通？絲絲唔講呢啲。不過，要將公司高層口講嘅論點，忠於原著而化成文字，仲要顧及股東睇得明，絲絲真心講句，寫嗰位同翻譯嗰位，辛苦晒！
余絲韻