孖妹S檔案：美股技術大師 教你睇升浪

Ralph：技術分析教父 Ralph Acampora

Kitty：剛搵幾位基金經理索料，問佢哋最近投資乜嘢，佢哋話大部分倉位都放晒美股。

彩兒：你係咪慢咗啲，幾個月前佢哋已咁講。不過，美股上周再創歷史新高，更破史上最長牛市紀錄，超越一九九○至二○○○年嘅3,452日。

Kitty：威喇……我講美股。

彩兒：跟我嚟，我哋去拜訪Ralph，佢係市場分析發展嘅先驅，係全球響噹噹嘅技術分析師同市場歷史學家。

Ralph：過獎。叻過我嘅人有好多，縱橫股壇50載，我學識一樣最寶貴嘅嘢，就係識都唔好扮代表。

論技術 學道氏理論 勝券在握

Kitty：分享吓，當我哋朋友OK喇。你嘅技術分析好架勢。

Ralph：我個人十分敬佩道氏理論發明者Charles Henry Dow。道氏理論有超過百年歷史，係根據道瓊斯運輸指數與道瓊斯工業指數（道指）嘅互動所得出，前者係美國20家最大航空、公路及貨運公司股票股價嘅加權平均指數；後者係美國30家最大、最知名上市公司加權平均指數。兩個指數都有預測美股股價能力，至依家仍然應用得到。

彩兒：有兩條走勢，跟住呢？

Ralph：記住用每日收市價就夠，日內嘅升升跌跌都只係小起伏，無咩參考價值。道氏理論嘅第一定理，將股市趨勢分為三種，分別係長期趨勢（Primary Trend）、中期修正走勢及短期小型折返走勢。

勿與長期趨勢打對台

Ralph：Dow應該鍾意望海，佢形容長期牛市趨勢似一個海浪冚埋嚟；而緊接住嘅波浪撤退，就等同中期修正走勢；至於喺旁邊翻滾嘅浪花，就似小起伏，即短期小型折返走勢。一句講晒，Never fight the primary trend！永遠唔好同長期趨勢打對台。

彩兒：記得年初訪問你嗰日，剛好係道指觸及年內最高位26,616點之時。當日你話，自二○○九年三月，美國展開一個長期牛市，預計可以長達廿年，所以美股仲有排升，好似坐咗上火箭咁。而環球股市亦會超好，好到你自己都要坐低冷靜！但呢幾個月，中美貿易戰玩殘中港股，你認為美股會唔會都變成輸家？

Ralph：你依家再問我，答案都係一樣。美國經濟唔差，美股會繼續上，我維持審慎樂觀嘅睇法。當然，間中少不免會出現上述嘅中期修正走勢及短期小型折返走勢。二月初嘅跌市，都同你哋分享過，我都被嚇一嚇。

彩兒：記得，你話隨時跌20%唔奇，但幾時會跌？

Ralph：參考美國前總統列根執政時嘅美股走勢，其實同依家非常類似，或畀到貼士大家。當時市場先經歷一個蜜月期，列根一九八一年一月二十日上任，美股有六個月牛市；但到第二年，美股就進入跌市，所以我擔心喺特朗普政府第二年，美股會跌。不過唔使驚，因喺列根執政時期，跌市後就緊接住一個十分長嘅牛市。

料有力攀上歷史高位

Kitty：佢哋兩人又幾似，作風都係非主流。若真係Copy八一年情況，即係美股牛市仲有排玩！

Ralph：中美貿易戰糾紛導致環球股市急跌，我密切留意事態發展，亦有啲擔心，但相信美股好快復原。道指四月試完最低位23,344點，之後五、六、七及八月嘅單月最低位分別係23,531點、23,997點、24,077點及24,965點，見到走勢遞增，反映美股逐步向好。

喺八月十五日，道指曾跌1.32%，觸及24,965點，當日陰陽燭呈鎚頭形態，係見底反彈嘅徵兆。其後一如我預期，突破八月七日最高位25,692點，我相信道指好快再破二月份25,800點高位，甚至飆至26,616點嘅歷史高位，一月風光再現。若道瓊斯運輸指數及道瓊斯工業指數同時創新高，就可確認為長期牛市。

講政經 土耳其危機 危極有限

彩兒：講完技術分析，你對中美貿易戰發展，以及土耳其危機睇法樂觀嗎？

Ralph：我期望中美會好好坐低傾，紓緩貿易糾紛，令環球股市有向上動力。至於土耳其危機，我唔係太擔心，唔覺得佢對環球市場有大影響。不過，若土耳其同美國雙邊關係有惡化迹象，最大輸家應該係土耳其。

彩兒：中美喺上周三重返談判桌，原本憧憬會化解貿易矛盾，但最終周四中午，美國向中國160億美元商品加徵關稅，咪照生效，而中國亦以牙還牙，向同等價值嘅美國貨品加稅。睇嚟未到十一月，貿易戰都唔會明朗化。

估今年內再加息一次

Kitty：另外，加息周期都係市場焦點。特朗普最近出口術，叫聯儲局唔好加息，佢究竟諗緊咩？

彩兒：中美貿易戰似乎要打持久戰，鬥耐力，特朗普梗係要盡力保住美國經濟，保住股市，期望國民生活如常。但聯儲局提速加息，就怕雪上加霜，令市場資金緊絀，拖累經濟及股市。目前聯邦基金利率維持於1.75至2厘，九月加息機會高達九成。

Ralph：我估今年仲會加多1次息。

揀股份 科網勢領漲 醫藥看俏

Ralph：話時話，市旺市淡都有好股有衰股，過去美股都輪流領軍，所以幾時都要小心入市呀。

Kitty：你幫我揀幾隻，我咪唔使咁愁囉。

Ralph：我相信科網股繼續會係領頭羊，睇好蘋果公司（美股：AAPL）及亞馬遜（美股：AMZN）。另外，美國中小型醫藥股、埃克森美孚（美股：XOM）及美國銀行（美股：BAC）都會炒上。就算中美貿易談判無進展，貿易戰愈演愈烈，美股短線有下跌風險，我仍建議大家長線投資美股。

彩兒：蘋果公司及亞馬遜過去多年走勢跟美股同步，一路升唔停。截至上周四，蘋果公司年內就升約27%，亞馬遜升約62%。至於埃克森美孚及美國銀行，前者股價曾經歷大跌浪，直至二○一五年八月觸及76美元後反彈；後者亦然，股價喺○九年二月下試2.53美元後反彈。

Kitty：話晒我都係果迷，見蘋果公司股價年內升近三成，都可以滔吓光。

彩兒：可試買一股。蘋果公司現時一股價格僅約千六港元。非美國公民或美國居民嘅港人買美股，唔使畀資產增值稅。

貿戰一好轉 新興貨幣彈

Kitty：但香港人買美股賺息要交稅，即股息嘅30%，都係諗諗先。若如買貨幣，你睇好邊隻？

Ralph：美元！因美元持續強勢，我會繼續揸美股。同時，我會靜觀其變，一旦中美貿易戰有轉機，資金流番去其他國家時，就要快手沽貨。另外，受貿易戰影響，最近新興市場股票沽盤好多，其貨幣亦面臨大幅貶值，如果最終一如大家所想，有好消息嘅話，新興市場貨幣應該會第一時間反彈。

彩兒：唔熟唔食，新興市場貨幣都係唔掂住。

個人威水史 創辦技術分析機構

Kitty：講到教父威水史，真係數唔晒。

彩兒：我知！喺一九八○至九○年代，你分別任職投資銀行Kidder Peabody及Prudential Equity Group，擔任技術分析部門主管。你亦創辦Market Technician Association，協助學員考取技術分析師專業認可資格。

Ralph：見笑啦。喺九五年六月，我寫咗一份有58版嘅報告，名為「Dow 7000」，道指當時只有4,000點，我估中佢會飆到7,000點。之後，我繼續估佢升至8,250點，九九年三月真係飆至10,000點。

Kitty、彩兒