周三晚美股全線向下，港股昨日裂口低開452點後跌幅收窄，更一度倒升82點，主因是市場憧憬中美雙方將於八月下旬進行經貿磋商。不過，恒指彈過上27,405點就無力，之後級級落，最終跌223點收報27,100點；國指跌55點報10,479點，主板成交1,245億元，睇落繼續彈散格。
講真，從中美貿易戰正式開打至今，中國一直處於下風，人仔貶值導致中港股市開始被重估（主因企業匯兌損失問題開始浮現），而且，以「侵侵」的作風，經貿磋商的成效又有多大呢？係咪可以對中港股市帶來刺激，相信畫公仔唔使畫出腸。
股王騰訊（00700）出完業績隨即一沉百踩，查實大行全線睇淡都唔係壞事，起碼可以令股價加快見底，總好過陰陰落。昨日集團股價裂口低開，最低見319元，埋單跌3%報325.8元，短線就睇睇去到300元心理關口的承接力，之後再作部署。
講起科技股，金蝶國際（00268）早前公布半年多賺近六成至1.69億元人仔，不過股價近幾日無力感十足，由高位11.34元跌到落昨日低位7.88元，最終跌近7%報8.28元。此外，部分科技股逆市做好，中軟國際（00354）四連跌後反彈1.1%，中國擎天軟件（01297）在橫行區底部見支持，升1.8%收市。
不過，近期市底之弱人盡皆知，科技股更一早被洗倉，今轉可能只是超賣後的技術反彈，隨時又散過，所以夠膽博的股民，有胡要即食。講到尾科技股都係睇龍頭，但騰訊今浪要跌到幾時？守唔守得住300元關口，真係唔敢寫包單，暫時都係留多個錢喺身好啲。
古勝