絲絲講場：WhatsApp兩創辦人為宗旨放棄過百億元
好多人鍾意用WhatsApp係因為佢無廣告，WhatsApp一四年畀Facebook（Fb）收購後，兩位創辦人庫姆（Jan Koum）同阿克頓（Brian Acton）仍堅持呢個宗旨，結果搞到同Fb不歡而散，佢兩位仲因為咁，可能寧願放棄加埋足足近13億美元（約101億港元）股份。
拒賣廣告同Fb傾唔掂
據知過去幾年，Fb舵手朱克伯格同營運總監桑德伯格極力想佢兩位喺廣告呢個議題開放啲，同加快其他增加收入嘅計劃。但結果，阿克頓去年九月請辭，庫姆亦於今年四月底宣布離職。
由於Fb收購WhatsApp時，二人可獲取獎勵股份，但要分四年逐季發放，當中庫姆獲約2,485萬股，但條件係仍繼續受聘。可能因為咁，傳聞庫姆到依家仍會每個月返Fb總部一次，Fb發言人亦都話佢仲係公司員工。
庫姆本月中應可取得250萬股Fb股份，以周二收市價計，值約4.5億美元。有指庫姆本月就會正式離職，放棄十一月最後一批約210萬股Fb股份，約值3.75億美元。至於阿克頓離職嘅時候，就已經放棄咗約值9億美元嘅股份。畀着你，要錢定要宗旨？
余絲韻