絲絲講場：廢鈔種出銀紙樹

話說金管局資訊中心「貨幣」展區尋日起以全新形象向公眾開放，亮點係以碎鈔作媒材嘅藝術紫荊樹「銀紙經」。

唔係洋紫荊 係「銀紙經」

「銀紙經」以化零為整為創作概念，用唔適合流通並已切碎銀紙，製成一棵藝術紫荊樹。藝術團隊將碎鈔按色分類，再整合為粒狀、條狀或片狀，並混合其他物料製成2,018顆各具形態嘅透明立方塊，以鋼絲串連，拼綴成抽象紫荊樹。

金管局話，呢棵「銀紙經」配上燈光變化，展現樹姿嘅四季美態，猶如可歌可頌嘅《詩經》咁話。與現時資訊中心內以硬幣為媒材嘅另一藝術作品「零錢唱」，可謂相映成趣。

其實金管局已經唔係第一次「玩」碎鈔，佢哋賣嘅紀念品中就有碎鈔造嘅紙鎮，一個「金牛」（千元紙幣）紙鎮要用138張「金牛」碎鈔先整到，咁計值成13.8萬蚊，但每個只係賣100蚊，可謂金管筍貨！

為咗配合一八年鈔票系列，展區亦全面更新展覽內容，加入更多互動元素，包括教育遊戲、多媒體展板同互動裝置等，不妨搵日去中環國際金融中心二期55樓睇一睇。

余絲韻