Market Insight：房託基金先揀領展
日前提到，從恒指牛熊證街貨分布睇，大戶殺牛誘因較大，咁啱中國財新公布的七月中國製造業PMI回落至八個月低位，加上中央似乎要堅決壓制房價上漲，為淡友提供加多腳機會。恒指昨日跌242點收報28,340點，主板成交904億元。
恒指今轉跌勢加速，當中主因牛市時撐起港股半邊天的騰訊（00700）已今非昔比。雖然股價昨日就跌得唔多，但睇番幅圖就真係弱到爆！從周線圖看，騰訊本周已失守去年十一月開始營造的複式頭肩頂頸線約365元支持。當然，未到周五收市，周線圖隨時有變，但純睇投資氣氛與市底之弱，騰訊喺短短兩日重上365元機會唔大；反之，如以頭肩頂形態量度未來跌幅，最深就去到255元，未有貨者都係咪手多！
鐵塔登場無助電訊股
有望成為今年新股集資王的中國鐵塔公司（00788），市傳將以每股1.26元定價，為招股價1.26至1.58元的下限，睇怕係見個市咁差，定價唔敢太進取。三大中資電訊股中國移動（00941）、聯通（00762）及中國電信（00728）近期走勢就算唔係反覆下跌，短期反彈力度都唔強，所以就算鐵塔於八月八日上市，咪天真以為可以順勢炒番轉電訊股。
市場風高浪急下，派息穩定的房託基金（REITs）始終有一批支持者，其中領展房產基金（00823）七月份進行多番回購，支持基金價格反覆向上。技術上，MACD牛叉持續，走勢利好，加上周息率約有3.2厘，都算係咁。
相對地，同為房託基金的越秀房產信託（00405）及置富產業信託（00778），周息率分別約6厘及5厘，但近日走勢就較領展遜色。既然領展持續偏強，如果手持大量現金又想買多少貨的話，不妨考慮買些少當收息，點計都好過將啲錢放入紅簿仔。
古勝