絲絲講場：亞馬遜玩「公審」員工震騰騰

外媒披露，亞馬遜舊年開始呢個所謂「幫員工上番正軌」嘅「Pivot」制度，被上司評為「表現欠佳」嘅員工有三個選擇：一係公司賠錢你走；二係畀幾個星期你去達標，以證明你對公司尚有存在價值；三係由其他同事去「公審」你同上司，睇吓邊個有道理，你贏咗就繼續有工返，你輸就唔該選擇一或二。

扮法庭 同事組成裁判團

「公審」以視像會議形式進行，扮晒法庭，裁判團由三位同事組成，涉事員工與上司各自「陳詞」，最後由裁判團決定道理喺邊個度。

「裁判」點揀出來？公司會畀人選名單你，你覺得會有偏見嗰啲，可以反對佢哋做裁判。但最終由邊三個人去「審」你，都係由公司決定。你唯一可以揀嘅係，「裁判」當中包含一位好似你上司咁嘅經理級，定寧願三個都係同自己一樣膊頭冇花嘅凡人。

實行年半 伙記七成打輸

有過來人話，「審」前已勁大壓力，要先見公司指派嘅「事業專員」，被「建議」刪走部分「陳詞」。正式「審」時，佢冇份聽上司「陳詞」，最後「定論」亦由上司一手包辦，自己唯一可以做嘅只係一味等「事業大使」電話，結果係通知佢，輸咗！

事實上，公審制度行咗年半，七成機會係員工輸。

有人才培訓公司嘅CEO亦批評，由三個三唔識七、唔知你一向點做嘢、兼且全無人力資源專業背景嘅人去主宰你職涯生死，簡直匪夷所思。但亦有職場專家話，點都好過連辯駁機會都冇就被炒。

至於有幫過亞馬遜員工為「公審」做事前準備嘅律師就睇死，呢個做法根本解決唔到問題。佢十個客中有四個揀「公審」，四個得一個「贏」，但係「贏」咗嗰個，結果做多一陣亦都劈炮唔撈。事關畀你「贏」咗平反到，之後咪又係對番住同一個睇死你嘅上司，仲要大家「公審」時互劈過，關係仲可以好得去邊，仲點合作？

職場上搵公道？有嘅有嘅，咪「自在人心」囉！即係同國王的新衣一樣，睇唔睇到，在於你係國王、大臣定細路。講完。

余絲韻