絲絲講場：證券行開張落力得滯?
喬遷係件大喜事，出動舞龍舞獅嚟慶祝不足為奇，但興奮到將拉簾條金屬路軌拗彎埋，你又見過未？
話說艾德證券期貨上個禮拜五搬辦公室到灣仔，宴請逾百名財演名人出席慶祝酒會，除咗有自家人艾德首席投資策略師盧楚仁、聯席董事陳政深等、香港股票分析師協會主席鄧聲興，甚至連芝加哥商品交易所都有派代表出席，認真夠晒Face。
管理層喺開幕儀式嗰陣，實在太勁，揭幕拉簾時連條路軌都畀佢哋拉彎咗，唔知以為佢哋個個都食菠菜大力水手上身啊。
擬申領更多牌照
艾德行政總裁張國榮話，未來會申請多啲牌照，包括槓桿式外匯交易（3號牌）、就機構融資提供意見（6號牌）同提供資產管理（9號牌），令服務更全面。
余絲韻