絲絲講場：基金之神慳出六億身家
領航集團管理超過5萬億美元資產，係傳統嘅長線投資基金，公司創辦人博格爾（Jack Bogle）更有「基金之神」稱號，係「被動型投資之父」，個人身家至少8,000萬美元（即6.24億港元）以上。
呢位「基金之神」平日為人節儉，佢仲講過：「我真係唔鍾意使錢喺自己身上！而且唔鍾意行舖頭，唔享受買嘢嘅過程。」
佢嘅節儉性格，好可能來自佢童年遭遇。佢阿爸當年經濟大蕭條冇晒成副身家，搵唔到嘢做，連屋都要賣埋，之後阿爸仲酗酒，結果搞到離婚添。
博格爾10歲開始派報紙賺錢，佢話學會一個道理，就係一定要有工作先有所得。
一生僅做兩件「奢侈」事
但佢話自己有兩樣嘢幾「奢侈」。第一樣就係：「每年冬季，我會花一星期同太太去佛羅里達州度假。」至於另一樣「奢侈」，就係體會施比受更為有福。今年89歲嘅佢早已安排將身家分配畀12個孫，同埋回饋畀曾經喺佢人生路上幫過佢嘅人。
事實上，佢早喺領航揸旗嘅日子，就已經常將自己收入近半捐去做慈善，呢方面咁闊佬，絕對值得學！
余絲韻