孖妹S檔案：拆解生科股贏輸之謎

謝：香港財務策略師學會副主席 謝汝康

李：美國藥劑師 李揚忠

張：信誠證券聯席董事 張智威

Evan：富蘭克林股票團隊股票研究總監 Evan McCulloch

Kitty：歷來入場費最貴嘅新股歌禮製藥（01672）即將上市。

張：歌禮製藥竟喺淡市中傳錄逾8倍超額認購，算勁！今年生物科技股係拉動投資回報嘅主要動力，建議大家將一半投資配置新經濟股，包括生物科技以及涉及同股不同權股份等。

彩兒：生物科技係嶄新概念，投資前一定要做足功課，唔好有投機心態。

香港財務策略師學會謝汝康稱，不少生科公司由小企業變成超級藍籌。	富蘭克林股票團隊Evan McCulloch表示，會對潛在生物科技公司的內在值及收入進行預測。	信誠證券張智威稱，買生科股屬高風險投資。

主流發展方向 涉醫藥食品 大多美掛牌

Kitty：咩係生物科技？

彩兒：即係生物加科技！利用生物細胞、生物程序或其代謝物質嚟製造產品，提升人類生活質素，促進經濟增長。好多食物生產技術，如發酵芝士及麵包、釀製豉油及紅酒、醃製腐乳等，都落入生物科技範疇。

Evan：部分生物科技，如喺丙型肝炎、囊性纖維化及癌症治療上，已有重大突破。而DNA測序嘅進步則幫助制訂更有效、更少副作用、更個人化嘅標靶藥物治療。

謝：生物科技產業係一個好靚嘅產業，靠醫療科技日趨先進，解決全球人口老化嘅問題。空氣污染愈嚟愈嚴重，但人均壽命卻愈嚟愈長。

Kitty：聽落幾正，好彩聯交所開綠燈。

在港股價升幅料遜美

謝：係呀！多數生物科技公司初上市，因未有盈利，被唔少交易所拒諸門外。美國卻早開大門，令多數生物科技公司集中喺美國上市。九成生物科技公司喺納斯達克證券交易所上市時都無盈利，但隨着企業慢慢成長，好多公司由原本嘅小企變成今天嘅超級藍籌。

彩兒：若買得中，咪隨時變富翁？

謝：普遍香港投資者對生物科技產業嘅認知唔多，擔憂其研發需時，回本期較長，投資風險增加，令佢哋對呢類股份有戒心。但美國已建立良好生物科技生態圈，且美國係罕有無對藥物價格規管嘅地區，企業盈利可以非常高。因此，相信喺香港上市嘅公司股價，一般比美國上市嘅升幅細。

兩地出現差異，亦解釋點解最近恒指及納指表現大相逕庭。納指成分股大多係新經濟科技股，投資者Buy佢願景，但恒指成分股主要為舊經濟股，因此走勢一蹶不振。

企業成功條件 擁有愈多專利 估值愈高

Kitty：生物科技公司未有盈利，可以點衡量估值？

彩兒：Evan應該答到你，佢管理富蘭克林生物科技新領域基金。

Evan：我哋會預測潛在公司嘅內在值及收入。潛在公司包括已有銷售產品嘅，或其產品研發中，但相信有正面臨床數據，並獲美國食品及藥物管理局（FDA）批准。

我哋有搵專家分析，了解新藥所針對嘅疾病有幾流行，以及其治療方法及專利，喺市場上嘅定位、競爭力及價格等。

謝：一般會留意其專利數量，愈多專利，專利權保護嘅時間愈長，估值就愈高。如果其藥物屬大路嘅產品，個市場仲會大啲。香港人最熟悉嘅生物科技研發產品係偉哥、薄血藥及血壓藥。相反，若係亞洲人常見病症如頭痛，特強頭痛藥針對嘅客源就較少，局限亞洲人。

揀潛力股 四招睇通晒

Kitty：點揀出有潛力嘅公司？

謝：聯交所批准某公司上市前做嘅審核，都幫投資者做咗一輪篩選。就算公司無盈利，應該都有正現金流，營運上無太大問題，同時研發產品可能已取得專利。

彩兒：香港生物科技協會贈你四招！第一，睇公司有無勁嘅科學家。第二，技術針對嘅市場夠唔夠大。若技術於世界各地能應用，預期銷量都會較強勁。第三，技術勁唔勁。睇吓產品能否通過臨床測試，有無副作用。第四，公司管理及賺錢能力。由此可見，方法同分析其他上市公司一樣，故須了解其管理層、公司架構及商業模式等。

李：睇埋公司過往業績。最驚公司得個殼，聲稱自己藥物勁，但可能用於動物身上就得，用於人就唔得。

Kitty：生物科技公司愈大愈強？

謝：唔可以單憑公司市值大定細，判斷公司勁唔勁，如公司睇嚟資金雄厚，但其實可能因為存在大量負債。另喺呢個行業中，收購合併並唔常見，因為一收購，就要接收埋企業嘅債務。

基本投資部署 對個股不了解 可考慮ETF

謝：要清楚了解某生物科技公司研發嘅技術，對一般投資者嚟講有難度。若唔清楚個股，我建議唔好買。若睇好生物科技產業，簡單啲嘅話，可買相關指數ETF，如iShares納斯達克生物科技交易所買賣基金（美股：IBB）。

納斯達克生物科技指數追蹤一籃子納斯達克指數中成分股嘅表現，該成分股必須係全球公認嘅行業分類基準（ICB）界定為從事生化及藥業嘅公司，公司市值最少2億美元，且每日平均交易量最少達10萬股。惟該指數屬市值加權指數，亦係芸芸生科指數中最老，於九三年十一月一日成立。過去一年，截至六月廿九日，該指數總回報近7%。過去十年，指數飆升逾三倍半。

另股價同盈利無太大關係，因股價係前瞻嘅。有時研發產品未到商業化階段，公司未到收割期，股價已狂飆。

Kitty：生科產業錢途似乎一片光明，合埋眼買都得？

張：都要溫書先，起碼要睇招股書及瀏覽公司網站。

Evan：雖睇好生科前景，但藥物研發及定價、企業估值及同行競爭等都存不確定性，投資風險大，故投資更要審慎。我哋專揀研發創新藥物，針對未滿足醫療領域嘅公司，但會避開未做臨床測試嘅技術，以及生物學上難以解釋嘅疾病。投資者最近擔心大型生科公司業務增長放緩，以及美國中期選舉對此板塊嘅影響。

未賺錢公司有危有機

張：買生科股屬高風險投資。公司一旦研發唔成功，隨時執笠，血本無歸。

彩兒：最近上市嘅多數係醫藥股。有無睇好邊隻？

李：我睇好AbbVie Inc.（美股：ABBV）、Gilead Sciences Inc（美股：GILD）及Celgene Corp（美股：CELG）。

張：新股歌禮製藥研發治療丙型肝炎病毒嘅「戈諾衛」新藥商業化申請獲批，傳會為公司帶來5億元的收入。投資宜選未有盈利嘅公司，先有望喺產品銷售時，受惠股價炒上。然而，買生科股係睇長線，若投資者資金充裕，不妨隻隻股買少少。

醫藥股份前景 須留意廠商及產品特點

彩兒：細分生物科技產業，有醫藥、檢測、環保、農業、食品及儀器等。當中醫藥與健康息息相關，感覺較易明，股份應較受歡迎。

Kitty：醫藥係咪最賺錢？

李：好難講。藥物由研發至銷售需時逾十年，要經三個臨床測試階段，研發任何藥物，其實成功率一樣非常低。100隻藥物拎去做實驗，最後能成功推出市面銷售嘅只有兩至三隻。第一階段係於老鼠或無病嘅人身上進行試驗，第二階段係搵20至100位病人進行試驗，第三階段就搵逾1,000位病人。

賣藥同賣菜幾相似，剩係粒藥或粒種子勁未夠，仲要視乎喺邊個菜園出產，種得好唔好，過往收成係點，從而估算該菜園或藥廠嘅出產質素及成功率。另外，要知產品有無市場，例如癌症藥，市面上已有各款標靶或化療藥。所以，每研發一隻新藥，都要了解該藥物針對咩病，有幾多人需要服食，同埋藥物有咩特別之處。

Kitty：一隻藥嘅合理定價係點計算？

李：藥物價格之所以貴，係因為部分藥物以減輕社會幾多負擔嚟量化。例如流感針嘅定價，會考慮打工仔因染上流感而令生產力減少所帶嚟嘅成本。

Kitty 彩兒