講到欺凌，投行一樣有。早排有間外資大行有個併購部嘅37歲董事總經理，就因蝦Intern而被炒。但有啲情況，你連投訴嘅機會都冇，就係當你遇上有「被動攻擊型」人格障礙嘅上司。心理學上，呢類人會以被動方式表達不滿，唔會擺上枱，但往往都夠你受。以下「被動攻擊型」上司七個特徵，如有雷同，實屬不幸。
１ 扮講笑實明踩：扮講笑嚟明踩你，將你視為出氣袋。點先算係？上司一邊踩你，一邊話「講笑啫」，但你又笑唔出嗰啲，九成係。
２ 指令唔清唔楚：落指令時，佢哋只會講啲玄妙「提示」等你參詳，務求令你壓力爆標。畀你估到九成，佢就搬龍門，總之結果永遠都係你錯。
３ 畀Mission Impossible你嘆：當正你係湯告魯斯，不斷精心準備冇可能嘅任務。其實等你做唔來，有藉口剷除你。
４ 搞辦公室政治：某同事特別得寵？不同Team之間各自係死對頭？統統都係你上司搞出嚟，明顯佢擅於挑起衝突、製造混亂，從中操控。
５ 愛搞無謂規矩：佢哋有時忽然按規矩辦事，愈複雜愈無謂嘅規矩，佢哋愈鍾意，因可作為打擊對手嘅工具。
６ 雞蛋裏挑骨頭：你犯咗小錯，細到一般人睇唔到，但只有呢類上司先會用放大鏡搵出，務求有機會公開懲戒你，最終目的係貶低你。
７ 冇心幫你升呢：培育下屬成才？呢類上司只會將心思放喺佢自己身上，對佢嚟講，下屬只係眾多嘅工蟻。
余絲韻