孖妹S檔案：貿戰累損手 專家教翻身

黃：財經評論員 黃志陽

林：晉裕環球資產管理投資研究部總監 林偉雄

炒牛證輸16萬學冷靜

Ocean：科技大學電子工程學四年級生 黃洋愷（Ocean）

首次入市日期：2017年6月

Ocean：第一次買嘅股票就係騰訊控股（00700）。一七年股市暢旺，騰訊勁升，持貨逾3個月先沽出，賺幾千蚊。其後亦因騰訊而搞到欠債。原本向財仔借5萬元，打算用嚟抽閱文集團（00772）及眾安在綫（06060）新股，但結果用筆錢買騰訊牛仔，仲向朋友借錢，最終牛仔被打靶，輸超過16萬元。依家每月要還3,000多元畀金融機構。

Kitty：你以後金盆洗手？

Ocean：又未至於，我明投資有賺有蝕，但經過嗰次大蝕，我再無咁勇，少咗玩牛熊證，同時學識投資要冷靜，期望喺未來一、兩年可賺番個本。另我開始發掘其他投資方法，如學炒股票、黃金及外匯。

買現貨金助對沖風險

Kitty：近來港股係咁跌，有咩策略逆市而行？

Ocean：以不變應萬變。我依家無炒港股，因長線唔睇好，貿易戰似乎有排打，影響投資者入市及消費意欲，企業賺少咗，股價自然向下。我又唔會炒細價股。況且，我要努力做兼職還債，係炒都揀穩陣資產，如買黃金避險。我買現貨黃金，一邊買升，一邊買跌，以對沖部分風險。

彩兒：投資動力嚟自邊方面？

Ocean：打工收入有限，所以想靠投資賺被動收入。我亦有意將來投身金融界。

科大 黃洋愷

港大 鄧志健

專家意見

黃：不建議資金少嘅投資者玩牛熊證，因投資風險大。

玩比特幣六位數上落

鄧：香港大學經濟金融學系畢業生 鄧志健（Ben）

首次入市日期：2017年8月

投資項目：比特幣，從未買過港股

鄧：我投資比特幣，試過炒輸六位數字，好彩最終回本，淨賺六位數字。

Kitty：過去呢一年比特幣價格Chok到暈，最高見19,345美元，近日見約7,000美元。

鄧：投資虛擬貨幣，就係睇好區塊鏈技術。依家剩番幾個以太幣長揸咋。區塊鏈特點係去中心化，透過程式代碼，建立分布式分類帳。WhatsApp及手遊嘅伺服器都可用區塊鏈技術開發，資料就無咁易洩漏，透明度亦較高。網上有唔少區塊鏈資訊，如交易人數、掘礦人數等，利用數據分析供求，就可搵出入市時機。

Kitty：最近多家銀行聯手開發貿易融資區塊鏈平台。區塊鏈技術夠成熟？

鄧：區塊鏈技術大有進步空間。上年有多隻ICO（首次代幣發行），部分因未經認證而進行推銷及無牌規管而被禁發行。我認同坊間對虛擬貨幣嘅比喻，指若比特幣係一個用嚟裝水嘅杯，以太幣就係一個多用途、可裝唔同嘢嘅杯。可見以太幣較比特幣更具投資價值。

彩兒：既然睇好以太幣，點解唔繼續炒？

鄧：賺夠就收手。掘礦投資成本大，唔諗喇。

Kitty：有無其他投資？

鄧：我唔炒個股。我會分析大數據，留意指數唔同時段嘅表現及大戶買賣信號等，用程式買賣指數期貨。指數期貨喺升市跌市都可交易，程式交易比人手操作好，因時間點捉得較好，又唔受個人情緒影響。

專家意見

黃：以太幣嘅技術係勁啲，所以Ben不妨用贏番嚟嘅錢投資以太幣。但若投資其他ICO，就要更小心。

城大 何進熹

財經評論員 黃志陽

長揸收息股勝在穩陣

何：城市大學資訊管理三年級生 何進熹

首次入市日期：2018年3月

投資項目：收息股

何：我今年三、四月先第一次入市，因剛完成實習工作先有收入。適逢跌市，我身邊唔少朋友由炒牛熊等高風險投資，轉買較穩陣嘅股份。我取向偏審慎保守，故買入收息股，如港燈（02638）及電訊盈科（00008）。揀收息股較好，因我對收息股較熟悉，家人亦有買，我可參考。

Kitty：若市況好啲，會唔會揀高風險、高回報股份？

何：唔會，除非等錢用。投資組合幾時都要有部分穩陣配置嘅。我打算長揸收息股，揸到執笠！但若港燈都執，就認真大鑊。

彩兒：對股票長情未必係好事。滙豐控股（00005）就係一個經典例子，唔少打工仔以前一出糧就買滙控，點知股價大跌，辛苦賺到嘅錢無咁一大截。

何：我會用一半收入投資。我對後市未太悲觀，仲諗住溝貨。若股份股價插兩成，我就驚。

Kitty：你對買股票有幾着迷？

何：都幾着迷！錢搵錢先係創富王道。我覺得虛擬貨幣高風險，所以無玩。反而我有抽小米集團（01810），認同佢薄利多銷嘅市場策略，盈利可期。雖小米被指估值過貴，但我相信小米係實力股。

專家意見

黃：買收息股是明智，從過往表現，其投資回報可比基金更佳。

攻牛熊證助悟出心法

陳：香港中文大學金融與精算四年級生 陳重彰（Neptune）

首次入市日期：2017年初

投資項目：指數及股票牛熊證

陳：我去年初開始炒股，第一隻投資嘅股票係騰訊，依家無持有喇。當時買騰訊都係跟人炒，同埋覺得大價股穩陣，其手遊業務唔錯。

Kitty：你好似賺唔少，正！

陳：但今年港股表現唔理想，人民幣持續貶值，不利中資股，我都係少掂為妙，最近無買正股。我專注炒波幅，投資指數、騰訊及舜宇光學（02382）牛熊證。不過，牛熊證投資風險始終較高，賺得多，蝕得多。上年十一月至今年一月，我試過兩、三日賺兩倍。

彩兒：你投資牛熊證經驗都唔少，有無悟出咩獨特投資妙法？

陳：回顧蝕錢經驗，我明白炒牛熊必須克服心理障礙，要識止蝕，亦唔好迷信，「五窮六絕七翻身」嘅傳統炒股智慧未必次次奏效。我會多做分析，了解外圍政經局勢及公司基本面等再入市。另會同朋友一齊研究，集思廣益。

唔借孖展 一成資金買股

Kitty：驚唔驚中美貿易戰變成第三次世界大戰？

陳：唔會喇！過去發生世界大戰都係非常突然，殺你一個措手不及，但貿易戰打咗一排，好多嘢都已攤牌。雖我持有股票所剩無幾，股市再大插對我無直接影響，但依家環境有啲似重演八十年代嘅日美貿易戰，兩國劍拔弩張。另最近港股成交少，投資氣氛轉淡，唔驚就呃你嘅。

彩兒：你有冇減少消費，積穀防飢？

陳：咁又無。我做好風險管理，唔用孖展。以一成資金投資正股，買入海螺水泥（00914）及舜宇。

專家意見

林：風險管理非常重要，建議股票及牛熊證佔比各半，牛熊證止蝕幅度宜定於30%。

中大 陳重彰	晉裕 林偉雄	中大 李梓滔

煲重愛康醫療未驚過

李：香港中文大學工商管理三年級生 李梓滔（Edwin）

首次入市日期：2017年9月

投資項目：醫療及教育股

李：去年九月眾安在綫上市後，聽聞唔少大戶吸納，我喺股價50元追入，80元沽出。嗰次係我第一次有心跳嘅感覺。

我一向唔係十分留意消息，買眾安算係例外。我鍾意自己分析各行業、公司前景及估值，發掘潛力股。我用咗10萬元投資，9萬元買入愛康醫療（01789），其餘資金就用嚟買華能新能源（00958）及中教控股（00839），至今回報逾兩成。

Kitty：你重注愛康醫療，驚唔驚風險過高？

李：我睇好醫療及教育兩個板塊嘅長線發展，愛康醫療發展3D打印膝關節置換植入物，係嶄新科技。投資愛康醫療及中教控股，均由抽新股開始。其後，喺愛康醫療股價3元時，再大手追入。兩家公司都專注內地業務，受中美貿易戰嘅影響微，相信股價企得住，所以我未諗住食胡。

彩兒：你有無預計幾時可達財務自由？

李：唔知呀。希望將來靠投資高風險產品，賺取一筆可觀收入，再轉買收息股，享被動收入。我始終鍾情食息股。

專家意見

林：Edwin嘅投資組合配置值得一讚，但投資醫療及教育股，需關注內地政策風險。

Kitty 彩兒