內地股市昨日反彈，滬綜指重上2,800點關口，升2.1%報2,837點，並帶動恒指及國指分別升0.6%及0.9%。不過，國指近期幾次跑贏恒指，主要受A股刺激；若然A股再度轉弱，而外圍又有風吹草動的話，港股亦難獨善其身。
市場估計美國總統「侵侵」雖然再加碼2,000億美元中國商品徵稅清單，但仲要等埋八月諮詢，此前或提供了一個「安全期」。另外，瑞信就為中美貿易戰作出假設分析，話如果貿戰升級至全面戰爭，令中國經濟出現硬着陸，則恒指有機會挫至11,000點。當然，該行補充話出現此情況的機會率極微。
古勝認為，從過往歷史觀察，美國的財技屬一流水平，故即使全球經濟「大飲茶」，相信美國都係傷得最輕的國家；反而無論中國定美國經濟唔好，港股都一定受牽連，所以就算港股跌勢逐漸放緩，但大家切勿對後市太過樂觀。
今次貿戰「被祭旗」的中興通訊（00763），獲美國撤銷近3個月來禁止美國供應商與其進行商業往來的禁令，事件終可告一段落，刺激股價昨日急升，大漲兩成五收報13.94元，重上10天及20天線。不過，集團經歷今次事件後，元氣大傷，未來兩年盈利隨時食白果，所以就算睇好，策略上只宜跟隨市場氣氛短炒一轉，見好即收，仲係揸唔過。
近期部分基建股愈插愈深，中國交通建設（01800）早前失守7.7元後跌不停，昨日試圖重上10天線，可惜未竟全功。
然而，若從另一角度睇，每次環球經濟出事，中國都靠內需、基建及穩樓市作自保手段，加上貿戰困擾下，內地貨幣政策有機會轉為寬鬆，變相利好基建股業務。中交建往績市盈率回到4.7倍的偏低水平，建議可先放入觀察名單，若股價能重返20天線約7.7元之上，可酌量吸納持中線，穿7元止蝕。
古勝