孖妹S檔案：學3招做淡友 Chok市贏住走

中美貿易戰不斷升溫，上周二仲嚇到港股一度跌近千點，搞到孖妹個心都離一離，好驚熊市殺埋身。與其坐喺度騰騰震，不如等孖妹搵嚟各界投資精英，教大家做淡倉賺番筆！

學3招做淡友 Chok市贏住走

卓：瑞銀亞洲股票衍生產品銷售部董事卓素華

諸：華夏基金（香港）ETF業務主管諸人進

林：國農證券董事總經理林家亨

金：期權及程式交易專家金曹

Kitty：Every cloud has a silver lining（黑暗中總有一線光明）。

彩兒：我信啊，依家個市都未算最差，投資者仍有大把出路。其實，市場上有唔少沽空產品，投資者可以按個人投資風險承受能力去選擇。等我逐一介紹你知。

1.期權及期指貿戰持續部署金融類

彩兒：買期權係指以繳付期權金嚟換取是否執行一項買賣相關資產，如股票或指數嘅決定權。睇升買認購期權，睇跌則買認沽期權。買方最大虧損係已付出嘅期權金總額，但賣方嘅虧損則可遠高於佢所收取嘅期權金。

期權專家金曹料，金融股包括中行及滙控等會維持弱勢。

若睇騰訊控股（00700）跌，就可以買騰訊認沽期權。不過，要留意行使價愈高、距離到期日時間愈遠、股價波幅愈大、股息愈高，都會增加需繳付嘅認沽期權金。另相關資產價格愈高、利率愈高，則會減低認沽期權金。

Kitty：呢個市況下，買邊隻期權好？

金：中美貿易糾紛過去都仲係出口術，但嚟緊於七月六日就正式徵收高關稅，我覺得今次貿易戰係真打，因中美雙方都唔會咁快示弱。因此，由依家至正式徵收高關稅期間，我估跌市居多。我預計金融股，包括中國銀行（03988）及滙豐控股（00005）等都會維持弱勢，淡友可考慮沽香港交易所（00388）。

即月期指淡倉有得諗

Kitty：個市咁淡，股份真係沒有最差，只有更差，咁樣好難揀出單一最睇淡嘅股份。

彩兒：除咗炒股，亦可炒期指，即指數期貨。不過，期貨跟期權唔同，期貨係一定要交收，但期權係由買方決定交收與否。另期貨嘅買方及賣方都有無限潛在虧損，期權買方則只需承受有限風險。

金：炒咩都好，記得小注！我建議買入即月期指淡倉，六月底下試29,000點，七月下試28,000點，因恒指黃金比率睇28,901點及27,486點，我相信第一個位應該快到，第二個位就應該於七月六日貿易戰開火後觸及。

要進一步確認跌勢，可留意是日恒指有無觸及過去兩日高位，另沽空增加、引伸波幅上升，以及資金流出，都是淡市嘅迹象。另外，人民幣如果繼續弱，北水流出港股，市況恐難以好轉。

2.牛熊證及窩輪成本平風險低啱短炒

林：期指按金大，逾十多萬元，因此我建議不如買牛熊證刀仔鋸大樹，適合短炒，且風險承受能力低嘅小炒家。

彩兒：牛熊證就似無按金嘅期指，係其中一種衍生工具，利用槓桿將利率倍大。如睇好後市就買牛證，睇淡則買熊證。

林：我買熊證嘅話，唔會揸多過三日，亦唔會買太遠期合約，免得溢價高咗。行使價及收回價差距100點就可以。

卓：無錯！受中美貿易摩擦影響，外圍不明朗因素多，港股亦變得波動，俗稱港版「恐慌指數」嘅恒指波幅指數喺周二曾飆至逾20，觸及六月高位，投資者可趁機短炒牛熊證及窩輪。

Kitty：牛熊證及窩輪嘅分別，係牛熊證有強制收回特性，若相關指數及股票觸及收回價，就會停止買賣，但窩輪無收回。窩輪價格會受引伸波幅及時間值損耗影響，但牛熊證則無。

國農證券林家亨指，如果買熊證，不會持貨多過三日。

瑞銀卓素華稱，港股近期波動，投資者可趁機短炒牛熊證及窩輪。

吼科網航運汽車Put輪

卓：淡友可考慮買入科網、手機設備、航運及汽車等板塊嘅認沽證（俗稱Put輪）或熊證。不過，從過往經驗分析，投資者鍾意博反彈多過追沽，所以好友除咗買熱門藍籌及恒指，亦可以考慮買入無牽涉中美貿易戰嘅股份，同時受中國內需刺激嘅股份，例如醫藥、物業、食品及燃料等。唔少投資者上周三買入恒指牛證，以及騰訊、友邦保險（01299）及建設銀行（00939）嘅認購證（俗稱Call輪），仲即日食胡。

彩兒：認購證應該揀價內定價外？

卓：若係騰訊、港交所及滙控等，就可選5至10%價外，有幾多選擇。如果係醫藥、教育及內需股等，呢類股份嘅認購證，發行商唔係推出得咁密，5至10%選擇未必咁多；如果將範圍擴大至15%，就多好多選擇，而且通常呢啲股份引伸波幅比較高，揀得貼價，有效槓桿就會低。

Kitty：我驚引伸波幅回落，買咗認沽證咪會蝕？

卓：投資者亦可以考慮買熊證，不受引伸波幅影響，但設收回價，買遠啲收回價嘅熊證就OK。例如騰訊熊證，收回價逾450至460元，有效槓桿為6至7倍；或者收回價逾440元，有效槓桿為10倍。

彩兒：你有無咩提點吓投資者？

卓：投資者有時大膽買入近收回價嘅牛證，其槓桿達90倍，可能未等到佢升，就被打靶，認真唔抵。所以宜買遠少少。

3.股票及ETF 謀定後動忌心急追沽

Kitty：中美貿易戰猛駁火，我點先可以漁人得利？

林：中國唔排除會針對美國大型市值嘅上市公司作為報復對象，港股短線料仍會於低位徘徊。惟壞消息已出現，沽空嘅投資者已食咗一輪，除非有更負面消息出現，否則再大插機會唔大，故唔建議依家追沽。

彩兒：個市上周跌得咁甘，真係驚熊市將至。

林：No，中美有機會喺七月言和！始終中國喺談判中嘅姿態唔係十分強硬，採孫子兵法，你進我退。而美國總統特朗普非常重視中期選舉，共和黨及民主黨都爭緊兩票，若共和黨失去兩票，喺財委會攞唔到大多數議席，美國就會變跛腳鴨政府，特朗普政治生涯就玩完。中美貿易對峙會拖多一段時間。

保守投資者宜持盈保泰，進取者可參考保力加通道及牛熊分界線等技術圖表，撈基本面好嘅股份，如華潤置地（01109）等大型內房股。內房股料唔會受貿易戰影響，因中國要保住GDP增長，並主要靠內房股支撐經濟。中美貿易摩擦持續，內地應暫唔會推限售及限價令，內房股成避風塘。長線可留意騰訊、中國海外發展（00688）及華潤置地。