孖妹S檔案：同股不同權炒法大不同

梁：宏高證券投資經理 梁杰文

關：易方資本高級分析師 關博文

馮：豐盛金融資產管理部分析員 馮宏遠

謝：香港財務策劃師學會副主席 謝汝康

事前做功課 刨財務報表 留意基本面

Kitty：抽同股不同權新股，一定賺硬？

彩兒：同股不同權係講緊公司嘅投票制度，等我同你重溫咩係同股不同權。

散戶當自己無投票權

彩兒：香港聯交所為拓寬香港上市制度而新訂嘅上市規則條文，喺今年四月三十日生效。內地智能手機製造商小米已喺五月三日提交上市申請。新訂上市規則（i）容許未能通過主板財務資格測試，且市值不低於15億港元的生物科技公司上市；（ii）容許擁有不同投票架構公司上市；及（iii）為尋求喺香港作第二上市嘅大中華及國際公司設立新嘅便利第二上市渠道。

豐盛馮宏遠稱，若同股不同權股份是純收息股，不宜追入。	易方資本關博文指，移動互聯網見飽和，睇好內地AI晶片設計公司。	香港財務策劃師學會謝汝康看好金融科技及電子商務前景。

Kitty：認購同股不同權新股，有咩特別嘢要注意？

關：分析呢啲股份嘅財務報表，其實都係大同小異，睇毛利率、淨利率、債務及股東回報率等。

梁：我嘅投資比較保守，亦會睇公司基本面，同埋有冇派股息嚟決定公司投資價值。目前透過同股不同權制度上市嘅公司，好多都係無盈利，又無息派嘅新經濟股，屬高風險高回報。

馮：假若佢係一隻純收息股，就一定唔好買。因為投資者無Say，股東會可輕易通過取消派息動議，想擺成世收息，真係諗都唔好諗。

Kitty：聽落同以往分析股份嘅方法差唔多。

馮：當然唔係啦，投資者有必要改變投資心態，當自己無投票權。雖然話上市規定同股同權股東必須佔投票權嘅10%，且有別於以往嘅上市公司，呢一批新經濟公司唔少都經過多輪私募集資，令創辦人喺公司正式上市時所持嘅股份已經唔多，但無可否認公司創辦人係有特殊股權。

睇業務屬新經濟與否

謝：仲要睇招股文件所披露嘅公司業務，辨認公司係咪真係屬於新經濟行業，而唔係魚目混珠。例如蘋果公司，唔好誤會佢係新經濟公司，其實佢係歸類做科技公司。

Kitty：我都要睇清楚小米嘅智能手機銷售收入佔比至得。

謝：若公司屬舊經濟，就違反咗開放同股不同權上市初衷。新興及創新產業需保留同股不同權架構上市，係因為公司嘅成功建基於創辦人智慧及能力，公司嘅運作不易被投資者理解，所以一旦創辦人下放投票權畀投資者，就可能會影響公司決策同正常運作，亦容易令股價大幅波動。

新經濟行業 睇好AI晶片 首選高增長

Kitty：你睇好咩新經濟行業？

謝：金融科技及電子商務。

關：移動互聯網見飽和，我更睇好內地AI晶片設計公司，因為佢哋嘅產品可以應用於各行各業，包括醫療、交通、酒店及服務等。

馮：新經濟行業中，都要識揀高增長嘅，例如科技或互聯網等先好投資，咁先可以期望股價會節節上升，預期三至五年可以食胡。

起底摸清創辦人能力

彩兒：投資新經濟股係潮流嗎？

謝：參考美國，上個禮拜美國聯儲局宣布加息，納斯達克指數嘅交投暢旺，仲明顯比標普500指數活躍好多呢。然而，加息預示美國經濟向好，企業增長強勁，而投資者多買納斯達克指數成分股，即係睇好新經濟行業嘅股份，多過傳統行業嘅股份。

謝：此外，10年前就話無人會諗到一部手機可以改變大家嘅生活模式。不過，有咗呢個顛覆性嘅範例，投資者依家會期待後起之秀。

彩兒：第一次接觸呢類股份，好緊張！

關：同股不同權喺美國早就流行，照理風險可控。同股不同權制度適合高速增長，以及處於中前期發展嘅企業。衡量投資風險就視乎創始人及其團隊思路係咪正確，同埋佢哋有冇做出有損公司嘅決策。

梁：講得係同股不同權，即係創辦人話晒事。因此，投資者分析呢啲股份嘅時候，要了解埋創辦人嘅能力同魄力，甚至佢嘅政治背景，一旦佢有咩事，都會影響公司嘅股價。另一方面，生物科技公司有快速除牌機制，隨時令投資歸零，增加投資風險。

謝：另外，有市值限制，杜絕咗中小規模嘅公司上市，減低部分投資風險。

小米值博率 業務惹憧憬 可趁機入飛

Kitty：睇吓我荷包夠唔夠錢抽小米先。

馮：可以抽吓，趁係同股不同權加埋中國預託證券（CDR）第一批，我估會開個靚頭。一般新股投資氣氛差啲，先係投機好時機，而投資者愈係磨拳擦掌，愈易焦頭爛額，近排新股靜番啲，入市最啱。大家可憧憬小米龐大用戶群，會帶挈其業務有新搞作，就似蘋果公司龐大用戶群帶挈App Store賺巨額收入。

投資睇中線 避免重注

Kitty：上市當日即沽定長揸？

馮：No，睇中線，6至9個月。

梁：新經濟行業變化大，行內競爭激烈，瞬間汰弱留強，睇一家公司前景，我最多睇幾個月。小米估值由最初預期嘅一千億元，減至最近預期嘅六百億元，就表示投資者對其憧憬轉趨理性，料最終上市價應更合理。小米生意模式唔錯，形成小米生態圈，推出唔少手機周邊產品，產品有大黏性，銷量唔會差。當然，小米手機唔會同蘋果公司手機直接比較，前者係較低端產品，主打印度等市場。

Kitty：小米估值縮咗，但仍係天文數字。

馮：預期小米估值偏貴，另聯交所對呢批公司嘅上市盈利要求唔高，所以唔建議重注，千祈唔好用頂頭槌飛！以騰訊控股（00700）為例，就算投資者起初只係小注入，無瞓身買，揸到依家都好正啦。

彩兒：騰訊○四年以3.7元招股價上市，直至今時今日，股份升價逾500倍。

梁：我都建議小賭怡情！

謝：始終小米喺香港及中國上市係有本土偏好（Home Bias），知道一定受歡迎，估值會搶高。認購小米新股孖展額一定爆，短線有炒作空間，但唔太睇好長線投資，因小米同蘋果公司市值差唔多，但估值貴過蘋果公司，公司盈利唔夠蘋果公司嘅十分之一。投資者買之前，衡量其高估值有幾多反映供應有限，有幾多反映業務價值及獨特性。

梁：新經濟行業並非散戶熟悉範疇，難準確預測估值。宜留意該公司有無其他比較猛嘅基礎投資者認購，如中國人壽（02628）及中國平安（02318），若粒粒皆星，搭沉船機會低啲。另可比較上市價同融資價格，再評估其股價貴定平。

彩兒：小米嘅上市保薦人係高盛、摩根士丹利及中信証券（06030）。

馮：跟大佬做法係OK。透過私募基金集資過程，都會做咗詳細調查。

Kitty：小米若雄心壯志，勢要成為國際巨企，上市地點就唔一樣。

看小米表現再諗美團

梁：呢個制度確可吸引中資企業嚟港上市，所謂肥水不流別人田。我估螞蟻金服，以至騰訊控股旗下公司會陸續上市。

Kitty：市傳內地團購網站美團最快九月招股，公司估值高達4,680億港元。

馮：美團生意模式唔錯，騰訊有入股美團，靠騰訊網絡，美團業務可望增長強勁。唔使急，睇咗小米上市表現點先再諗。

梁：留意小米股價變幅，若股價尋底，短線同股不同權炒作氣氛會差咗。若股價飆升，港股成交增多，最受惠應係香港交易所（00388）。

馮：新股表現會受公司質素、估值及市場胃納等影響。不過，打頭炮嘅幾隻同股不同權公司上市，衰極都有個譜，估值隨時升兩至三倍。

Kitty：你估Facebook、Google及LinkedIn等公司會唔會嚟港上市？

關：我無聽過。暫見唔到有來港上市必要，除非佢哋考慮打入內地市場。

Kitty 彩兒