Market Insight：燃氣股北控賣點多

到底後市能否上攻32,000點？老實講，升多三、五百點唔係咩稀奇的事，問題係真係到嗰日的話，大家應該把握機會建淡倉抑或係落場追貨，先至係要研究的問題。

睇住恒指幅圖，都真係有啲閉翳。二月以來都係上上落落，本月初由上落區底部回升，高開上，賭隔夜容易賭錯邊，太貼市即使細細注賭，密密輸的話都一樣好甘！

貿易糾紛未斷尾

形態上，恒指突破三角形阻力仍然成立，但暫時向上突破動力仲係未足夠。古勝認為恒指愈近31,500至32,000點水平，唔好再追貨住，等真係爆邊先至好諗加注，免得又喺個上落市頂都中伏接貨，寧買貴都莫買錯。

之前受中美貿易事件影響的股份，周一都借勢反擊，其中萬洲國際（00288）成升幅最大藍籌，升4.8%。科技、航運及出口股亦有買盤支持，其中瑞聲科技（02018）及招商局港口（00144）分別升4.6%及3.2%，聯想集團（00992）升2.1%，耐世特（01316）升4.8%。不過，感覺中美貿易問題唔會咁快就斷尾，嚟緊美國官員仲要來華再傾，可能事件發展仲有起伏，股民咪太早放鬆警覺，撈底要限注兼嚴守止蝕。

話時話，中國講話以後會買多啲美國貨，到底咩股份會受惠？估計將來多進口的都係農產品同能源之類。在憧憬進口天然氣量增加，去年燃氣股受氣荒影響令氣價成本上漲的不利因素可緩解，周一燃氣股亦見有動靜，中國燃氣（00384）升逾8%，華潤燃氣（01193）升逾4%。

古勝則留意咗隻北京控股（00392），近月表現唔錯，股價由月初低位38.5元，以多支陽燭回升至周一收報43.55元，10天線剛重上50天線，且企在100天線之上收市，基本上已重回一個月前的股價水平。

短線或先行整固

北控主營燃氣業務，呢期可受惠於燃氣板塊利好氣氛，再加上食品股如啤酒股表現強勁，北控都揸住燕京啤酒，照計可受惠行業估值提升，股價雙重利好，都算升得有道理。走勢上，料北控股價短線或會在42至43元水平先行整固，下一個較大的阻力位在48元，41元支持未宜失守。

此外，同系的北控水務（00371）周一突破三頂阻力，以大成交升上升，收報4.96元，升幅近一成，成交急增至5.14億元。係咪純粹跟北控炒一轉，不得而知，但純睇走勢，呢轉主要阻力喺5.2元水平，踢得穿的話仲有景，短線回吐守得住周一的平均成交價4.85元，可望多兩眼。

古勝