Market Insight：息口趨升 銀行股有得諗

恒指一度飆上31,592點，走勢已確認突破三角形阻力，理論上後市有機會反覆向32,000點推進。當然，古勝唔係「侵侵」肚裏條蟲，唔知佢又幾時發功嚇人，短線只有限注邊睇邊做。睇番恒指牛熊證街貨資料，周一盡殺回收價在31,300至31,399點水平的恒指熊證後，下一個重貨區就在32,000至32,099點區域。

大笨象博財息兼收

大戶繼續挾上，派吓牛仔出街，兼殺埋班熊仔，先至嚟大調整的機會較大，但係咪好似睇電視劇集咁畀大家估到晒啲「劇情」，就要做事後孔明！

騰訊（00700）績前股價繼續向上，周一高位見416.8元，惟即現獲利回吐，收報411.8元，升0.7%。老實講，如果400元樓下有撈貨短炒的話，績前沽貨獲利合情合理；但如果冇平貨在手，都唔爭在等埋份業績先算。

港股高收，貢獻點數最多的係友邦保險（01299），股價再創52周新高75元，收報74.35元，升2%，帶動恒指上升點數約60點，建設銀行（00939）貢獻46點，滙豐控股（00005）及工商銀行（01398）同貢獻33點。息口看升，銀行股有資金吸納，大笨象派息將於十七日除淨，留意博財息兼收的機會。

手機股舜宇最得寵

受到中興事件現轉機刺激，本來手機設備股應有勢嚟個大反擊，其中舜宇光學（02382）高位見過155元，收報153.5元，升7.8%，可惜瑞聲科技（02018）及丘鈦科技（01478）走低，以致板塊只個別發展。

講番瑞聲份季績，收入及純利均較市場預期為低，主要是匯率因素及產品組合改變令毛利率受壓。不過，照計周一股價已一定程度反映利淡消息。

見隻舜宇彈力唔曳，嚟緊富士康又會喺A股上市，發行模式將為後續獨角獸企業發行股份或CDR提供借鑑。行業既處於吸金狀態，產品推陳出新，照計瑞聲都唔使睇得太過悲觀，短線調整守住喺110元樓上毋須自亂陣腳。

古勝