絲絲講場：內地搞科企 卅歲被嫌老?!

有上海科企公司招聘主管話，依家請嘅除非係經理級，否則三字頭求職者嘅CV（履歷），佢哋連眼尾都唔睇。北京嘅科技初創公司請網站開發工程師，就算冇大學學歷亦有得傾，但一講到年紀，Sorry，30歲以上免問。

馬化騰程維廿幾歲創業

難怪有咁嘅風氣，事關啲內地科企巨頭本身創辦公司時，一個二個都係得廿幾三十歲。騰訊（00700）主席馬化騰27歲就搞微信，程維29歲就創辦小桔科技搞「滴滴打車」，劉強東30歲創辦京東商城，馬雲34歲就創辦阿里巴巴，雷軍創立小米時叫做年紀大啲，但亦只係40歲！

內地嘅請人文化係咁，甚至連深交所早幾年請行業監管、法律監管、會計監管同電腦專才，亦話要28歲以下，結果畀人話年齡歧視先收番。

年過三十，即使有內地科企肯請，亦未必捱到佢哋普遍嘅返工996制（即是朝九晚九每日12粒鐘，一星期足六日），就算身體得，亦要冒家變嘅險。所以行內人話，呢行似足職業運動員，20歲起瞓身搏命，到40亦未見有出頭，算罷啦，讓路吧！

就咁嘅，喺香港，請人若年齡歧視會觸犯法例，有冇覺得安心啲呢？

余絲韻