Market Insight：手機設備股高下立見

外圍兵荒馬亂，出乎意料是股市充耳不聞，美股連升四日，港股三日內由低位升逾七百點。繼周二報復式反彈408點後，昨日港股再升133點收報30,536點，成交卻跌至兩個半月新低。

環球醞釀新風暴

新興市場走資似愈演愈烈，香港人對於一九九七年亞洲金融風暴應印象難忘，從泰國放棄固定匯率，引發亞洲鄰國貨幣急瀉的骨牌效應，當時港府還老定到向泰國申請援手提供貸款救急，最後自己火燒後欄，股市樓市崩瀉。

聯儲局啟動縮表，配合美息由低走高，透過借低息美元投向新興市場貨幣賺息差的音樂椅遊戲告一段落，危機會否重演？古勝無預知未來的水晶球，但盛傳阿根廷已走去搵IMF尋求300億美元貸款，一場距離香港一萬八千里的風暴，經已揭開序幕。

美國總統特朗普確認美國退出伊朗核協議，油價昨日亞洲時段衝上71.17美元的三年半新高，港股「三桶油」成為升市火車頭。股市向來跟紅頂白，騰訊（00700）強勢時大把分析員出嚟大合唱，到今日400元樓下掙扎，即刻收晒聲。

騰訊下周出季績，花旗報告把目標價由532元降至488元，同時把今年開始的三年非通用會計準則盈利預測調低至744億元、993億元及1,273億元人仔，評級維持買入。古勝認為乜都假，上返405元批股價樓上先算。

舜宇光學（02382）四月手機鏡頭出貨量7,084萬件，按年升60.9%，按月升16.7%，在今年智能手機市場增長放緩，中國首季出貨量更出現倒退之下，舜宇營運數據可說是喜出望外。事實上，手機零部件行家瑞聲科技（02018）今年股價累跌15.7%，舜宇卻錄得42.1%升幅，升幅冠絕藍籌，捧場客果然有先見之明。

舜宇強得有道理

有老友早兩日上咗車，佢話高層講明將來淨利率唔會高過5%的小米，可挾着千億美元估值，過百倍PE上市，無理由純利率舊年破雙位數，去到接近13%的舜宇，往績市盈率43倍唔抵買過小米咁話。姑勿論理由係有點似是而非，不過兩日帳面執到近十蚊，都只能向佢寫個服字。

近日積極收風，由前幾輪入股的投資者口風，加埋芬佬朋友聽到1,000億美元笑而不語，除非五、六月港股大發神威，衝穿33,484點歷史高位牛氣重現，小米叫高開低，以650億至750億美元估值上到市，都已經算交到功課。

古勝