絲絲講場：內地虛擬幣死對頭飲和頭酒

做和事老搞呢場飯局嘅，係內地著名天使基金真格嘅大佬徐小平。徐大哥叫到，策源創投、火星財經、三點鐘社群、車庫咖啡、鈦媒體、OKCoin同火幣嘅七位掌門阿哥阿姐當然畀面出席。

三缺一 網上發炮

內地虛擬貨幣平台以OKCoin、火幣與幣安三強鼎立，互相一向係死對頭。所以當晚飯局亮點，絕對係OKCoin創辦人徐明星與火幣嘅李林碰杯嗰下！

不過呢場和頭酒，基金大佬徐小平其實係為鈦媒體創辦人趙何娟同OKCoin徐明星擺嘅，事關兩位之前喺網上互片。片啲乜？麻煩閣下自己上網搵。

唔知當晚飯局傾咗乜，淨知佢哋飲咗幾萬蚊人仔嘅酒。咦，在場唔見幣安創辦人趙長鵬嘅？原來當大家碰緊杯，趙長鵬忙住網上推文向另一啲行內人發炮。話時話，今次係冇叫佢，定叫咗唔嚟呢可？

余絲韻