絲絲講場：委內瑞拉137倍通脹超驚嚇！
委內瑞拉在野黨率領嘅國民議會周一自爆，截至今年四月計，該國一年物價飆13779%，即係超過137倍通脹！冠絕全球！
想靠炒股對抗通脹？當地股市年頭至今確勁升1,289.44%，即是近13倍！咪以為股市升就實帶來財富，事關每個國家嘅股市都係以本國貨幣計嘅。
貶值速度 匪夷所思
睇埋當地貨幣玻利瓦爾。一○年時玻利瓦爾兌美元係8兌1，一三年時係30兌1，到舊年已經接近10,000兌1！仲未計當地嘅黑市貨幣市場，絲絲都唔曉計，總之就係無論股市升幾多，一兌番美元，早已血本無歸。
依家當地要25萬玻利瓦爾先買到一打雞蛋！搞成咁，其中一個理由係當地政府不停印銀紙。點算？佢哋嘅解決方法，就係再印新鈔喎，總統馬杜羅今年三月宣布貨幣改革印新鈔，新嘅50玻利瓦爾面額鈔票取代舊嘅50,000玻利瓦爾面額鈔票，簡單講，就係將面額尾數減三個「0」。
不停印鈔 出虛擬幣
經濟咁亂，係咁印銀紙，當地人寧願揸虛擬貨幣自保，就算Bitcoin幾波動，都唔夠玻利瓦爾貶值咁得人驚。就連當地政府兩個月前亦推自家官方虛擬貨幣「石油幣」（Petro），以該國儲存量逾50億桶嘅油田作發行基礎。話就話係虛擬貨幣，實則以石油做抵押嘅借據一張！有冇投資者落疊？聽講中國反應冷淡，印度可能有興趣。
對上面啲數字仲係無乜概念？咁講，當地全國九成人活於貧窮線下，通脹下蔬菜麵粉變成奢侈品，食物短缺，早幾年仲係中產嘅依家要喺垃圾站擸嘢食，好多人要殺貓狗充飢，囚犯被迫食死老鼠！睇到呢度，有冇覺得自己身在福中呢？
余絲韻