Market Insight：手機設備股暫宜觀望

今年初相信無人會預計A股會弱到咁，入摩前夕，滬綜指反而由一月底高位累瀉13.8%，年內錄得6.5%跌幅，在亞股中，倒數排第一。即使中央致力金融去槓桿，為信貸危機收拾殘局工作仍在進行，但睇見A股級級落，央媽都忍唔住出手托市，周二突然宣布降準，等於釋放4,000億元人仔流動性。

A股ETF博得過

A股由地獄折返人間，昨日倒升收市，但港股真係唔敢樂觀，大媽昨日粉墨登場上演武士復仇，反觀北水懶理港股死活，滬深港通繼續嘔凸，連續五日淨流出。

同一時間，連本地薑都唔賣帳，大戶賭國家隊關照，A股短期好可能比H股甚至恒指都強，故踴躍北上，有達73.4億元人仔淨流入滬深兩市。好耐未見過咁大場面，如果手痕想搵嘢炒，可以試吓南方A50（02822）及安碩A50（02823）兩隻A股ETF。

金管局日日接港元沽盤，仲愈接愈大，銀行體系結餘返回海嘯前的幾百億元水平，恐怕是指日可持。隨着港元拆息追近美元拆息，標誌着金融海嘯十年以來，本地資產市場享盡超低息的好日子正式告一段落。即使港股同香港樓市經濟的關連度愈來愈低，惟心理鐘擺效應下，加埋大市高位計一成都未跌夠，有心長坐想撈貨，真係唔使心急。

中美貿易戰即使仲停留喺動口未動手階段，但足已草木皆兵。之前話減進口車關稅，到發改委揚言汽車行業會全面開放，二二年全部取消限制。舊年的明星股，今年變成籮底橙一樣，統統見紅，昨日華晨中國（01114）以及北京汽車（01958）最傷，跌9.4%及10.1%。如果喺52周高位摸頂，兩股的捧場客帳面輸緊45.7%及36.2%，依家想做壯士，恐怕都已經太遲。

中興事件影響大

美國商務部發禁令，七年內唔畀美國企業向中興通訊（00763）出售零件，中興繼續高掛免戰牌，有消息指可能連Google的Android，未來都唔准預載在中興手機裏面。

消息仍在發酵，但古勝諗起都覺大鑊，要知中國生產中低價錢平價手機已係首屈一指，惟核心關鍵技術，尤其是系統方面，仲企喺起跑線。全球手機軟件系統，已經被Android加埋蘋果公司IOS壟斷，市佔率99.99%，其他系統早就死清光，基本上無其他替代品。

中興作為全球第七大手機生產商，唔用得Android，更加無可能用到IOS，即係叫佢唔好賣手機，都咪話唔頭痕。會唔會玩到咁大，暫時言之尚早，但短期手機設備股難免被悲觀情緒主導，自問轉身慢同心血少的，都係食少多覺瞓好啲。

古勝