Market Insight：消費品牌股仍具潛力

環球股市面對最大的不確定因素，再唔係經濟復甦夠唔夠力，又或者聯儲局加息會唔會出手過猛，而係神經刀「侵侵」日日新鮮鑊鑊甘的Twitter偉論。

在華爾街啱啱開始淡化中美貿易戰，當係「侵侵」同老朋友耍吓花槍，作為商人及前藝人，果然深懂吸引關注。貿易戰聽到悶咩，轉頭又話對敍利亞動武，博反彈的股民暈得一陣陣。「侵侵」呢種語不驚人死不休的治國手法，令港股每日收市後到翌日隨時天翻地覆的市況，仲要維持幾耐？

最怕「侵侵」玩出火

古勝昨日睇咗「侵侵」的支持度，截至本月二至八日的調查有41%。若同克林頓、小布殊及奧巴馬上任第二年的四月份50%、76%及48%支持度相比，係就係低一截，但要留意係二月底貿易口水戰開始之前，支持度不過37%，即係話愈搞搞震，宣揚大美國保護主義，即使講咗當做咗，美國人一樣受落。

「侵侵」民望持續谷底反彈，只怕佢老哥必然樂此不疲，繼續當白宮辦公室係真人Show錄影廠，萬一玩大咗擦槍走火，點收科只有天曉得了！

剛剛畀女股神點中的騰訊（00700），昨日一度落到408.8元，臨收市彈番多少先帶住個市拗腰，唔使恒指穿頭破腳咁肉酸。市場缺乏焦點，炒鬼搵番呢排大冧檔的股份博死貓彈，最搶眼的包括有俄羅斯表態支持提供流動性對抗美國制裁的俄鋁（00486），昨日升6.3%收2.19元。另外，國際油價回升，見中海油田服務（02883）抽高6.2%收報8.53元，返回10天線樓上。

迅銷交投淡宜長坐

迅銷（06288）派中期成績表，截至二月底止半年溢利1,041億日圓，按年升7.1%，銷售高過公司指引。由分部收入表現，日本UNIQLO上半年收入及溢利都相當標青，收入升8.5%，經營溢利更大升29%。日本零售市道復甦，也歸功於去年天氣較為寒冷，惠及HEATTECH、羽絨服、搖粒絨（Fleece）等防寒衣物銷情強勁。

自首季開始，海外UNIQLO銷售收入已超越日本本土，上半年勁升42.8%，主要來自大中華業務帶動。近排外圍立立亂，基金都睇番好中國內需股，舊年迅銷已經部署將內地市場發大嚟做，到二○年，將中國分店數目翻一番去到1,000間。睇完上半年份成績表，絕對係對辦有餘，但此股宜坐不宜炒，唔嫌成交較疏，當佢內地潛力零售股看待，真係諗得過。

古勝