Market Insight：好淡夾雜入市審慎
有說人生如戲，沒料到國際關係亦如是。所講係呢期最熱的中美貿易糾紛，美國總統「侵侵」繼對中國商品開出兩張關稅罰單後，再來預告正研制千億美元關稅罰單，搞到上周環球金融市場發軟蹄，沒料「侵侵」於周日又發文話中國領導人係永遠的朋友，而中國官媒亦預告要做開放市場的「火炬手」，若季內真係平息糾紛共創雙贏的話，係咪好睇過戲？
講到尾，商業世界冇永遠的朋友，亦冇永遠敵人，只有利益。受到中美雙方口風緩和的消息刺激，港股昨日一度抽到上30,514點，收報30,229點，升384點，主板成交回升至1,152億元。不過，今日好友勝，難保第日又變番淡友翻身，反正對待眼前上落市，升跌都要以平常心看待。
騰訊Chok住等爆邊
記得三月下旬，美國財長指中美雙方進行頗有成果的對話，有信心雙方可以達成共識，恒指一度由30,000點邊抽上31,000點邊，但之後美方的一連串動作，將恒指炸到落29,500點水平。所以話，如今中美在角力，互拋浪頭，有心理準備嚟緊好淡消息會繼續夾雜出擊，炒指數一千幾百點上落，要藝高人膽大，想炒股唔炒市都要有心理準備要坐足一季。
長假完畢互聯互通重啟，但北水卻未見踴躍。騰訊（00700）又再重上配股價405元，高位見過414.6元，收報410元。古勝認為，針對騰訊的情況，在如此敏感位Chok上Chok落，只有兩個可能，一係就透過大震倉收貨，後市股價將再創新高；另一可能就係派發，後市向下望番三舊半或樓下，反正冇中間路線。短線貪正股夠波幅短炒相關輪證，唔知音樂椅遊戲音樂幾時停，只可小注怡情。
比亞迪（01211）首季度因電動巴士補貼下降致純利下跌，消息令股價被「洗白白」，由70元樓上跌落60元，真係直插冇水花。不過，今年比亞迪的業務旺季在年中才開始，理論上現時身處的第二季是藉利淡消息質低收貨的好機會，實力投資者不妨坐定定，並留意技術超賣時的加注機會。
比亞迪致力提升效益
公司高層證實在重組動力電池業務，預計今年底或明年初完成，計劃在二二至二三年分拆上市。換言之，未來比亞迪的動力電池不僅對內部供貨，還將對同業供貨，這是面對電池行業競爭日趨激烈的安排，亦係透過重組盡量發揮規模效益以提升整體盈利能力的做法，策略在預期之內，長遠影響亦屬正面。
古勝對長線持貨未係太擔心，其中一個原因係若然呢間重點企業都搞冧，咁整個本土電動車工業可以冚旗，對於國家戰略產業的前景照計唔使太悲觀。
古勝