絲絲講場：卡撒天嬌大數據製枕頭
卡撒天嬌（02223）副主席及行政總裁鄭斯燦尋日喺傳媒午宴上透露，佢哋研發結合大數據技術嘅智能枕頭，如無意外預計可以喺六月至七月推出。
枕頭可以點智能法？聽講話，枕頭會結合大數據等科技，令枕頭可以Fit到閣下個頭形，從而提升睡眠質素。至於實際點運作、點大數據法，大家不妨發揮想像小宇宙。
瞄準年輕人市場
除咗智能枕頭，鄭斯燦話今年仲會拓展針對年輕人市場嘅「快時尚」床上用品及家居用品銷售業務，產品種類包括頸枕、家居服、行李箱等。
佢仲自爆，某政府部門都係用佢哋嘅床單被鋪，皆因貪佢哋啲產品嘅質素好，針織密度高，物料又唔易撕爛，可以減少意外發生咁話喎。到底邊個政府部門要「減少意外發生」？你估吓！
余絲韻