孖妹S檔案：貿戰打爆市芬佬教轉身

鄧：施羅德多元化資產產品業務經理 鄧偉志（Ricky）

貝：天達資產管理「四大動力」聯席主管 貝德鳴 （Mark）

彩兒：一陣見到兩位大師，你諗住問啲咩？

Kitty：先問貿易戰，再嚟個大包圍，由內到外，由大中華講到環球市場；再由上而下（Top-down），由下而上（Bottom-up）。

彩兒：冇問題，佢哋嘅答案會滿足到你。Ricky可以用宏觀分析，Mark就可以傳授選股策略。

施羅德鄧偉志預料，今年全年大市仍會繼續波動，類似二月初的跌市會陸續有來。

天達貝德鳴表示，目前看好周期性股份，包括資源股、科技股及金融股等。

環球經濟：中美打貿戰 增長恐受累

彩兒：特朗普上周四宣布將對中國進口商品徵收逾600億美元關稅。中美貿易戰一觸即發？

鄧：特朗普係商人出身，會明白大規模發動貿易戰對美國百害而無一利，依家出招都係部署中期選舉嘅選戰策略。若中美打起貿戰，環球經濟增長會放慢0.5至0.6個百分點，因物價上升，通脹升溫；加上經濟放緩，導致滯脹，股債均被波及，到時真係Cash is king！

彩兒：當貿易戰唔會發生，今年環球經濟好定壞？

鄧：唔錯呀，預計今年環球經濟增長會達3.5%，股票比債券更加能捕捉到經濟增長動力，所以呢隻基金主力投資股票。

今年料難脫波動市格局

Kitty：嚟緊三季，股市係咪順風順水？

鄧：一七年股市波動率較低，今年第一季就正常番啲，我預計今年全年都會繼續係波動市，類似二月初嘅逾10%跌市會陸續有嚟。

大家仍要小心，我哋有增持美元，對沖亞洲股市波動及轉弱嘅風險，因為一般亞洲股市同美元會行相反方向。我哋估計，美元短線會呈強，但中長線維持平穩至偏弱。

彩兒：Ricky，你管理嘅基金股債比例近2比1，面對債息上升風險，會否再減債券比例？

鄧：身為主動式基金經理，每日會睇實個盤，隨時調整資產配置。既然依家睇好環球經濟，當然買多啲股票。債息上升，我哋亦有用美國國庫債券期貨去縮短所持嘅債券年期。

Kitty：聯儲局剛剛加第六次息，債市無運行啦！

貝：通脹預期升溫，債息回報未必可滿足投資者，故投資股票更好。長遠睇，股債比例要彈性調節，因為央行會因應通脹預期而煞車收水，市場流動性愈嚟愈低，股市未必可以持續向好。

Kitty：目前股市唔錯，你啲客仔係咪多咗？

鄧：今年投資者普遍睇好亞洲新興市場，當然二月初港股調整時，亦見資金流走。

選股策略：睇基本因素 勿理會「噪音」

Kitty：我呢排努力睇業績報告，睇到眼矇矇。

彩兒：個個刨業績，唔通個個都識刨業績咩。可唔可以贈我一招必殺技？

鄧：我哋睇實主要趨勢，留意基本因素，包括債息走勢、PPI及CPI等，然後彈性調整基金組合。我地冇特定一條Formula定追揸沽策略。另外，有一個重要秘訣，就係要有Discipline先會贏，因為市場上好多Noise，會影響心理質素。

貝：所以點解，我堅持用由下而上嘅選股策略，睇四大動力，唔靠宏觀經濟分析。喺公司隻字不提Macro嘢，邊個一講就要罰5蚊！

Kitty：你仲會睇咩指標？

貝：波動率。一七年股市波動率低，加上低通脹、低增長，真係唔尋常！至於今年，美國人的薪酬、當地經濟增長動力、息率都紛紛向上，且預期通脹升溫，我估聯儲局嘅加息步伐會比市場預期快。

資源科技金融看高一線

Kitty：有咩心水股值得買？

貝：過去一六年經濟增長較慢，通脹低企，債息近乎零，投資者揀穩健收息股就最啱。惟最近半年，見到呢啲股份嘅盈利增長未如理想，係時候要轉轉倉。目前，我睇好周期性股份，包括資源股、科技股及金融股等，佢哋股價較落後，且預期盈利增長快速，投資者可看高一線。

鄧：我預計今年通脹會高啲，對息口敏感嘅行業有利，所以基金有增持銀行股及能源股。我亦睇好消費及金融股，認為佢哋仲有炒作概念，如內地消費升級主題。隨住利率向上，息差擴闊，銀行及保險股盈利增長強勁。另外，穩健股份估值都仲吸引，因一七年大升市時，佢哋升幅唔算大。況且，佢哋防守性較高，萬一今年迎來跌市，佢哋跌幅都有限。

彩兒：增長型股份又點？騰訊控股（00700）上個禮拜三公布嘅年度業績，期內收入按年增長56%，原本係可喜可賀嘅事！點知貿易戰憂慮升溫，加上其大股東南非企業Naspers進行減持，股價應聲下跌。

鄧：互聯網及科技股估值偏貴，所以我已先行獲利減持。

地區潛力：亞洲增長強勁 中日股市看俏

彩兒：雖然環球經濟普遍向好，但唔同地區嘅投資潛力始終有偏差。

鄧：亞洲經濟增長速度喺全球可算係數一數二。環球貿易額及貿易量回升，都有利以出口為主嘅亞洲經濟體，所以亞洲資產嘅估值相比成熟市場吸引。美元維持穩定格局，對亞洲資產都有支持作用。

彩兒：你呢隻基金都幾睇重北美洲地區，有逾48.5%嘅投資。

貝：你錯喇，美國呢個咁大嘅市場係不容忽視，Benchmark都有逾60%，我哋僅用五成資金買美股，算係低配喇。我更睇好中國市場，依家中國股票佔總投資逾10%。另外，我哋買咗唔少日本股票，特別係工業股，雖然佢哋盈利唔算高，但勝在估值平，且好多公司做緊架構重組，預期盈利增長會加快，料股價會飆升。

芬佬懂交流 選股勝Robot

Kitty：聽聞機械人選股命中率幾高，你點睇？

鄧：基金經理同機械人嘅投資策略唔同，好難直接比較。機械人可能Work，但唔少主動型基金經理都長線跑贏大市。

貝：我哋有用大數據，篩選喺四大動力指標下表現最好股份，然後再研究買唔買。我哋比機械人優勝之處，係我哋會「登堂入室」，與公司管理層交流，再決定投資價值。

Kitty 彩兒