Market Insight：舜宇光學強勢突破

不過，睇番沽空數據，盈富基金（02800）的沽空比率回升至74%，似乎大戶都係傾向賭後市會回落。本來中美貿易戰升溫下，買跌都係正常，但令古勝唔係好放心的是，係「侵侵」作風冇得估，好似呢頭話就鋼鐵及鋁進口產品徵關稅，嗰頭又話邊啲國家可豁免，其他國家又可以再傾，故會唔會最終兩國貿戰拍拍膊頭就大事化小，小事化無呢！

港股聚焦業績表現

事實上，別忘記「侵侵」係經歷過多次破產的商人，能做到美國一哥，當然唔簡單。佢好賭投機以爭取最大利益的性格，路人皆見，並會繼續展現在施政上。若然貿易戰只會兩敗俱傷，照計美國唔會輕率倒自己米。所以話，當大家都驚咗美國高舉貿易保護主義旗幟而睇淡的話，最好都係睇定啲，冇咩必要入市就繼續做住塘邊鶴先，等爆邊先至跟車為妙。

眼看國際形勢風雲色變，但話說回來，港股暫時維持上落市，焦點放在業績消息。外圍科技股洗白白，但無礙藍籌科技股發力，除騰訊在績前先跌後升外，昨升幅最大的舜宇光學（02382）更以新高159.8元收市，升8.6%；升幅排第二位的瑞聲科技（02018）收報159元，升4.4%，兩者股價相當接近。

舜宇之所以急起直追，主要是去年業績勝預期，尤其是下半年表現較佳，大行普遍預期今年上半年其手機鏡頭相關業務可受惠於雙鏡頭潮流以及相機升級趨勢而維持強勢。為應付需要，管理層在分析員會議透露今年預算資本開支20億元人仔。綜合券商最新目標價，大和最牛睇185元，當然，目標價唔會一步到位，若然想買貨，可候短線回吐試155元或樓下區域再作考慮。

康哲藥業睇位上車

瑞聲現價與52周高位185元尚有一段距離，下周二公布末期業績，若然中美真係打起貿易戰，瑞聲都幾閉翳，皆因美國市場佔其收入比重逾半。所以，若然要在舜宇及瑞聲之間二選其一，寧願揀隻走勢突破的強勢股，都唔揀隻有重大不明朗因素困擾的。

昨日提及的石藥集團（01093）爆咗上22.5元收市，真係難得好股！此外，留意到隻康哲藥業（00867）現大陽燭，升7.8%，睇勢呢浪或可挑戰20元大關，短線回吐守得住昨日平均成交價18.5元的話，可以諗吓小注坐順風車。

古勝