絲絲講場：港交所主席加薪周松崗無份

不過，原來港交所主席同一班非執行董事都唔執輸，今年都有人工加。

建議人工加到219萬

港交所委任嘅外界顧問，就建議今年度對主席同一眾非執董嘅酬金作出調整。

其中，主席酬金由去年嘅210萬元，增至219萬元；非執董就由去年嘅70萬元，增至73萬元，加幅都係4%，但建議要等到四月廿五日舉行嘅股東大會上通過！

現任主席舊年搵少咗

不過，依家非執董向唔同董事委員會提供服務而獲支付嘅酬金就維持不變，稽核委員會主席酬金仍然維持係20萬元、其他成員就有12萬元、出席每次會議酬金都係照舊3千元。

雖然今年港交所主席就快有得加人工，但現任主席周松崗會喺四月卸任，所以就冇佢份喇。不過，周松崗舊年嘅酬金其實都唔嘢小，作為主席及非執董，總薪酬達324萬元，較一六年微跌1%。

講開周松崗，馬場今晚（廿一日）將會舉行港交所盃，應該係周松崗最後一次以港交所主席身份出席呢個盛事。

今年港交所嘅重頭戲係落力吸引創新公司嚟香港上市，據聞港交所今晚就請咗唔少會喺本周四出席生物科技公司論壇嘅嘉賓出席，論壇係為生物科技公司造勢，聽聞反應遠超預期，登記人數超晒額！

余絲韻