絲絲講場：理財10習慣預示你必發達

1【及早為退休儲蓄】：若你愈早為退休準備，所得嘅「複利率」將遠超想像，好大機會可提早退休。股神巴菲特強調，唔可以睇小錢搵錢嘅威力，日子有功，必有驚喜！

咪做樓奴卡奴

2【冇畀層樓綁住】：巴菲特勁有錢，但仍住喺佢1958年買嘅舊樓。佢話：「我好高興住喺嗰度，有好多美好回憶，冇諗過搬。」唔好為層樓而被綁一生，供樓佔你月入三成或以下就好嘞，若再多就變「樓奴」，隨時影響退休！

3【準時還錢兼還足額】：無論係學生貸款或樓宇按揭，每期都準時還款及還足額，千祈唔好睇小因拖延而產生嘅長期成本！

4【唔拖卡數】：唔好睇小拖欠信用卡數嘅利息效應，必須每月還清，千萬咪只還Min Pay（最低還款額）。

靠投資錢搵錢

5【儲定「應急錢」】：人生無常，你唔知幾時要應急，想成為有錢人就要未雨綢繆。應儲幾多？最少夠你喺冇收入下維持三個月嘅基本生活。

6【唔會使盡意外之財】：公司忽然派花紅？政府突然回心轉意肯派錢？若你能將呢筆反正花清光都唔緊要嘅「意外之財」用於投資或減低債務，效果一定比享樂更理想！

7【控制物欲】：若能夠控制欲望，慳落嘅錢必定能令你更有錢。唔係叫你放棄享受，只係唔好過火。

8【恒常有得加薪及升職】：要有錢，最實際就係收入增加，而且加幅高於通脹。所以，要畀心機做嘢！若恒常有薪加有職升，想窮都難。

9【儲嘅退休金多過標準】：係人都知齋靠強積金唔夠退休，若然想提早歎世界，最好額外再儲啲！

10【投資組合進取但多元化】：齋靠人工同儲錢，睇怕冇可能提早退休，連股神巴菲特都認同愈早開始投資愈好。不過，謹記投資唔好孤注一擲，組合必須多元化，例如有股票、債券、外匯等，仲要有耐性，不求極速致富。

余絲韻