孖妹S檔案：學睇易經 投資添勝算？

金：期權及程式交易專家 金曹

盧：風水命理大師 盧恆立

易經占卜：港股三月未必大波動

Kitty：易經占卜聽落好神奇，我想試吓。

盧：冇問題，你想知啲咩？

Kitty：我想知，恒指三月嘅走勢。

盧：你專心諗住問題，兩手夾住三個銅板，碌碌碌，擲出第一個爻。重複六次就成一個卦。

（每擲出一個爻（編者按：音肴，八卦的符號），盧師父就用陰陽符號記下結果，直線代表陽，斷開咗嘅線就代表陰。然後運用邏輯推理分析結果。）

盧：六爻無動，即係港股三月冇明顯大升大跌；卦象亦無財，即係搵唔到錢。但易經準唔準，都仲要睇吓你問嘅問題清唔清晰。

彩兒：唉呀，靠占卜發達，不勞而獲，真係得？

盧：我學占卜，係鍾意個學問，所以自己就少用占卜投資。不過，我有啲客人就會問，例如滙豐控股（00005）呢個月會唔會升穿80元。

彩兒：究竟易經係咩？潛龍勿用，我就聽得多。

盧：睇嚟你對易經有啲誤解，潛龍勿用係嚟自周易，一本由周文王寫嘅政治哲學書，但唔係占卜用，佢哋冇咩實質應用。算命用嘅易經叫文王卦，用五行生剋制化嘅循理去預測未來發生嘅事。而易經係由伏羲寫，佢作嘅八卦，就係用八個陰陽符號，去表達整個宇宙嘅八種自然能量，天、地、水、火、山、澤、雷、風。

利用銅板為港股前景占卜，準繩度有幾高？（伍嘉浩攝）	風水命理大師盧恆立指，樓市今年會跌，可趁回調入市。	期權及程式交易專家金曹表示，目前股市較為難玩。

邏輯推理 開窗睇未來

彩兒：易經同陰陽有咩關係？

盧：易經一字由日月組成，講陰陽。太極圖就係日月、陰陽嘅代表符號，講述萬事萬物嘅起始。易經又可講為一個系統，用唔同組合嘅陰陽，代表萬事萬物所有元素。易經用嘅陰爻陽爻，亦同電腦科學嘅二進制碼嘅0同1好脗合，都係去傳遞訊息。

易經同八字都係邏輯推理，但易經就更似開個窗，畀你睇未來。另外，八字係專注解答同生日有關嘅問題，包括錢財、感情、健康及婚姻等。易經就可以解答其他問題，仲會睇得更精細。

Kitty：○八年歐洲國家盃賽果，八爪魚保羅咪估中晒嘅，唔通保羅學咗易經？哈哈！

風水玄學：十月恐冧市 宜揀股炒

Kitty：盧師父，你仲有個玄學大師稱謂。順便向你請教埋玄學先。

彩兒：究竟玄學同易經有冇衝突？

盧：冇！易經及中國玄學都可以用金、木、水、火、土表達。喺玄學上，金代表憂愁，木代表脾氣，水代表恐慌，火代表喜慶，土代表思想。所以中國人愛紅色，因紅色係火，係喜慶。

Kitty：心情同股市升跌有幾大關係？

盧：一般火年，股市會升，因大家心情開朗啲，經濟蓬勃啲。火嘅相反係水，水代表恐慌，喺水年，投資者通常比較驚唔敢入市，股市沉啲。

彩兒：過去咩年係火年？

盧：7字尾嘅年份多數係火年，所以大家講，逢7股市升，都幾啱！○六及○七年都係火年，所以股市都幾暢旺，但到○八年鼠年，鼠屬水，所以下半年爆煲。而由○八至一二年都冇火年，直到一三年火年，美股亦開始復甦。一四年馬年，道指一度累漲約6,000點。

一五年羊年，係乾土，沙漠都好熱辣辣，所以帶火。一六年猴年丙申年，太陽喺頭頂，都屬於強火。一七年丁酉年，丁係一支蠟燭，每逢7字尾都係丁，所以股市都升到嘭嘭聲。

2018土年利環保電子

Kitty：一八年又點呢？

盧：丁年之後到戊年，一八年係戊戌年，五行屬土，洩火氣，戌指十月，即火嘅墳墓，所以十月好大機會有大跌市。之後幾年亦無火，我估港股會續死氣沉沉，直到二二年虎年，屬木，木生火，先再有火嘅迹象，股市先再有起色。

彩兒：倒數預測嘅十月股災仲有半年，真係唔投資？

盧：雖然我唔睇好一八年環球經濟及股市，但有板塊相對會好啲，可以炒吓。一八年係土年，木剋土，「我剋者為財」，今年木嘅行業如媒體、環保及製衣等會較興旺。另外，火生土，火嘅行業如電子、娛樂、飲食及能源等都唔錯。

盧：至於土嘅行業，我就唔睇好，因為土見番土，互相競爭，所以房地產行業嘅利潤會少啲。另外，金嘅行業同樣麻麻，因為土生金，而金剋木，要見到木先有財，所以銀行、汽車及重工業股份表現都會弱。

西九樓盤旺到2024年

彩兒：地產股差啲，意味樓市都會冧？

盧：需求會少咗，故樓市今年會跌啲，但香港樓市長遠硬淨，大家可趁今年回調少少入市喇。再者，嚟緊幾年都係水年，水係土嘅財，地產行業又再搵到錢，料樓市會同步升番。

彩兒：依照風水學，邊一區嘅樓盤較有升值潛力？

盧：○四至二四年，旺西南見水嘅地方，包括西九龍、薄扶林及淺水灣等。二四年之後，就旺東南及北面，旺北方見水嘅地方，例如中環及北角等。

Kitty：靜靜雞醒我幾句，話我知今年自身運程？

盧：話我知你嘅生肖同時辰八字。若你同美國總統特朗普一樣，屬狗犯三迎，今年遇嘅挫折會比較多。

技術分析：期權引伸波幅有啟示

彩兒：要準確掌握入市時機，我覺得點都要用吓技術分析嘅。

金：有兩個指標一定要睇，包括期權引伸波幅，及認沽期權倉位有幾多，因除咗係一啲預料唔到嘅事，通常大跌市前，都會見淡友部署。例如二月初，引伸波幅突然飆高，由20%升到30%，如果一個唔留神，可以輸得好甘。若見引伸波幅突然爆升，你就要小心3至4日之後，港股可能會大跌。

Kitty：你咁有先見之明，一定逃過二月初小股災一劫喇。

金：嘻嘻！二月嘅大跌，我早就估到，因為一月升得過龍，所以要回一回。而且，沽空信號、MACD及牛熊沽出信號都明顯。我事先將好倉收起，亦唔會喺跌市估底，直到見引伸波幅縮番，所以最終仲有少少賺。

留意二十國集團會議

彩兒：最近，環球新聞嘅焦點都係特朗普嘅舉動，你點睇事態發展，同埋從認沽期權倉位，有冇見到咩端倪？

金：科恩辭去白宮經濟顧問一職，代表以後特朗普嘅決定，未必得到華爾街支持，咁都幾麻煩。科恩之前甘願放棄喺華爾街嘅要職然後入白宮，善意嘅推測，係因為佢想幫美國搞好經濟。喺上個禮拜尾，美國國務卿蒂勒森被炒魷，中美貿易關係再陷入緊張局面。事態發展成點，就睇二十國集團財長及央行行長三月十九日喺阿根廷聚首時會傾成點喇。

彩兒：唔怪得全球股市避險情緒升溫。

金：目前嚟講，唔少認沽期權嘅行使價都喺30,600點呢個大支持位。唔少認購期權嘅行使價係喺32,000至32,400點。Call Put相若，好淡爭持，相信恒指短期會喺31,400至31,800點拉鋸。不過，如果恒指可企穩31,000點，後市唔會太差。恒指一個月升跌千幾二千點好正常。

短線不妨炒科網內銀

Kitty：依家個市係咪難玩啲？

金：當然！以前，外資出報告，個市升跌好易估，但依家市場有好多假動作，內資唔跟外資，失常、難玩。

Kitty：短線炒咩股份比較好？

金：龍頭股如騰訊控股（00700）、瑞聲科技（02018）及舜宇光學科技（02382）會持續有優勢。內銀股如建設銀行（00939）及招商銀行（03968）都會受惠聯儲局貨幣緊縮政策，息差擴闊，帶動盈利增長。另美國對伊朗核協議，可能採取更強硬態度，長遠有利油價向上，故睇好中國海洋石油（00883）。

Kitty、彩兒