Market Insight：科網巨擘搞OTT佔優

上周五港股走勢悶到暈，富時指數變動刺激下，成交增近三成去到1,436億元，惟恒指全日得二百餘點波幅，最終跌39點報31,501點，成個星期指數累升505點，全部來自周初裂口高開，後市都係要等上破31,798點，挾走班淡友至有機會發圍。

騰訊業績左右大市

本周焦點，必然係周三的騰訊（00700）全年業績，睇上周五一度衝上472.8元，二月跌市後高位，差唔夠4蚊返回歷史高位，港股後市能否再攻頂，都要睇騰訊份成績表會唔會再一次有驚喜。

樂視樹倒猢猻散，不過今時今日無人夠膽否定OTT（Over The Top）網際網路電視的潛力。睇美國網絡電視一哥Netflix快高長大，市值已達1,381億美元，約1.08萬億港元。市場三不五時就傳迪士尼同埋蘋果公司準備好巨額支票，想將佢收歸己用。珠玉在前，內地個個都想成為中國版的奈飛（Netflix）。

在智能手機全面普及，內地近半家庭已經換上能夠連接網絡的智能電視，而且覆蓋率仲繼續上升當中，大眾的眼球花愈來愈多時間在OTT製作的節目上，順理成章，他們也攤分廣告市場更大的份額。有研究預測，中國的OTT廣告營收會由一六年大約6億元人民幣，三級跳去到二○年達128億元人仔的規模，短短幾年升逾廿倍，增長驚人。

個個想在OTT大餅分到一啖，上周美國上市的百度斥資10.1億元人民幣入股創維數碼（00751）從事智能電視系統的附屬公司酷開，交易後，創維持股量則由71.89%降至64.32%。以作價計算，即係話酷開整體市值91.8億元人仔（約113.8億港元），以酷開一六年稅後利潤955萬元人仔，入股市盈率是天價的1,191倍。

之但係，創維手上股份值73億元，等於本身114億元市值的六成四，刺激股價一度急升一成八，不過捱唔到散場，只升得5.3%。

准入門檻逐步提高

大家只看到Netflix的風光，卻忽略OTT要做得成功，重視原創作品及對自家製作毫不吝惜的元素。一八年Netflix製作費高達80億美元，吸引過億訂戶真金白銀付款觀看並非無因。隨着訂戶基礎夠大，也更有更大資源投入製作，形成一個循環，漸漸寡頭壟斷市場，大幅提高新經營者的入門門檻。

中國OTT暫時不容外資沾手，概念在未來幾年的中港資本市場肯定長炒長有，不過最後有幾多經營者有天量資源投入，最後跑出的，恐怕只會係大家耳熟能詳的兩三間科網巨擘。

古勝