絲絲講場：京東搵Partner 港開無人便利店

入舖頭須經「人臉辨識」

話說，京東國際業務拓展部高級招商經理祝紹斌講開京東集團嘅「無界零售」願景，提到京東有考慮向香港企業或合作夥伴輸出技術，仲以內地早已有嘅無人便利店為例，睇吓未來能否與香港企業合作發展，講明呢個係京東香港團隊工作之一。

京東早喺舊年十月已喺北京開設首間無人超市同無人便利店，聽聞淨係京東自己，喺內地嘅無人超市家陣已開到十間。

現時一般內地無人店嘅玩法，多數係用家要先下載公司個App並綁定用家自己個樣，經人臉辨識入舖頭，結帳就透過貨品上嘅RFID（電子標籤）技術，攞完貨離開時走過結算通道，間舖就會感應到買咗啲乜，然後喺買家帳戶自動扣數。

無店員幫手恐更頭痕

不過咁喎，消費過程不幸遇上問題，又無職員現身幫手，都可能幾頭痛。聽講內地有消費者試過，無法通過「人臉辨識」系統入唔到舖。連亞馬遜間無人店「Amazon Go」亦試過，有小朋友即拎即食「走數」。而要撕走貨品上嘅RFID亦唔係難……

話晒香港人出名乜都要快，若京東真係落實將無人便利店引入香港，會唔會有升級版本？京東回覆，會因應本地市場需求及政策可行而調整咁話。

但有條數絲絲唔識計，無人店雖可慳番請人收銀同睇舖，但齋請人執貨同清潔會唔會仲貴呢可？

余絲韻