Market Insight：資金輪動資源股發力

不過，世事往往都出人意表，尤其係呢期才開始參與的外資們並冇農曆新年呢回事，所以都係謹慎啲，唔需要清倉，又唔好滿倉，減少短炒注碼，中長線組合繼續坐定定就可以。

報道指，內地大部分地區出現寒流，電煤取暖需求大大提高，電煤供應緊張的消息，刺激煤炭股昨日逆市走強，中國神華（01088）高位見過25.65元，收報24.75元，升3.9%，兗州煤業（01171）升7.67%，中煤能源（01898）則升5.71%。

煤炭股短線未炒完

三大煤炭股之中，以兗煤走勢最強，股價由十二月低位約7元邊，反回升上昨日高位見14.98元，兩個月不到股價已翻一番，神華股價由十二月低位18.64元，反覆上升高見25.65元。中煤能源波動較大，股價由十二月低3.28元，升至昨日高位見4.31元。

坊間有謂「過冬唔凍過年凍」，係咁的話分分鐘寒流會在春節前持續，加上短線指數呈波動，煤炭股叫做有特別的行業因素支持，照計仲有幾日玩吓，炒家可以望多兩眼。

估唔到兜咗個大圈，又輪到煤炭股接力，反映有長錢在吸納中資股，唔係炒完就散。昨日逆市升的唔單只煤炭股，重慶鋼鐵（01053）升11%、紫金礦業（02899）升4.7%、馬鋼（00323）升近4%，多隻水泥股亦向好。可以話，其實呢轉升浪真係冇咩中資股主流板塊係未行。相對地，古勝認為內地券商股都係未升夠皮，高位震倉活動明顯，趁回吐又可以留意上車機會。

中美博弈 小心選股

外電引述消息指，美國政府擬興建5G超高速網絡，其中一個方案係由政府斥資興建，另一方案係由網絡供應商興建，惟經考慮後認為第二個方案不可行，故會傾向由政府斥資興建。據講美國政府正在接觸相關的歐洲和亞洲公司，卻不包括中國公司。

美國5G拒中國企業於門外，故見昨日中港電訊設備股都要捱沽，中興通訊A股（000063.SZ）急跌逾9%，H股（00763）跌逾7%。看來美國5G建設防範中國的說法，又係貿易保護主義作祟，唔排除今日「侵侵」公布的國情咨文，可能會有更多有關中美貿易關係的新消息，所以大家要有心理準備「侵侵」又搞搞震，至於電訊設備股，仲係先忍忍手，別急着撈貨。

古勝