絲絲講場：日旅館潮玩一鍵歸位？

採用自動泊車技術

有間日本旅館就用咗汽車商日產嘅自動泊車技術，一個按鈕，拖鞋、茶几、坐墊，全部自動歸位！

呢間旅館叫ProPILOT Park Ryokan，一眼望落去，同啲傳統日本旅館冇乜唔同，都係啲拖鞋齊齊整整放喺客人除鞋嘅門廳處，一樣係榻榻米房內有茶几與坐墊。

不過，你最估唔到嘅係，啲拖鞋、茶几同坐墊都配備晒特別版本嘅日產ProPILOT Park自動泊車技術，當客人唔用啲嘢時，只需撳個掣，啲拖鞋、茶几同坐墊就會自動回到指定位置。

拖鞋茶几識得還原

呢項技術首次喺舊年十月於日本推出嘅全新日產聆風車型上亮相，呢項技術能夠探測到周圍物體，原本係方便駕駛者靠撳個掣，架車就能夠自動停泊喺指定位置。

今次用落旅館啲拖鞋、茶几同坐墊度，唔知啲客人會唔會掛住玩「泊」拖鞋、「泊」茶几、「泊」坐墊，而唔記得休息呢可？

余絲韻