絲絲講場：麥樸思光頭有段古

曾住香港 火燭燒髮

查實佢後生時，聽講原本有一頭濃密嘅頭髮，話說喺60年代，即是佢廿幾歲時，佢住喺香港。有日佢呢個香港屋企火燭，佢為咗救火，唔小心燒親啲頭髮。點知之後聽啲同事話俗語有話「十個光頭九個富」，於是佢索性剷光個頭，從此殿定佢嘅金融界「尤伯連納」嘜頭。

Fine Arts出身 做過琴手

仲有樣嘢你未必知，原來佢大學係讀藝術出身，之後再讀傳理攞埋個Master，再喺六四年於MIT嘅政治經濟系攞埋個博士學位。原來佢仲有樣嘢好叻，就係彈得一手職業水準嘅鋼琴。佢以前讀緊波士頓大學時，好多時夜晚喺夜店兼職做鋼琴手賺錢幫補學費。

嗱仲有，佢母語查實唔係英文，事關佢爸爸係德國人，媽媽係波多黎各人，所以佢細細個喺屋企其實主要講德文同西班牙文。

不過絲絲最想知嘅係，佢啲頭髮原本係咩色嘅呢可？

余絲韻