絲絲講場：星展金童玉女利是封 玩凍齡轉Look

年年改形象 貶眼12歲

呢對金童玉女，囡囡叫阿「星」，囝囝叫阿「展」，佢哋○七年第一年喺利是封上出場時，仲係BB仔BB女樣，之後星展年年幫佢哋喺利是封換樣，個樣一年大過一年，絲絲就咁睇住佢哋快高長大，唔經唔覺佢哋今年已經12歲。

不過，佢哋今年個樣似乎唔多覺有成熟到，不過就玩造型做潮童。囡囡阿「星」潮戴金金六角形眼鏡，紮個丸子髻，非常Sharp醒；囝囝阿「展」就變咗四眼仔，仲喺利是封背面帶住狗狗頭箍同大家迎狗年。

人仔細細就學人「凍齡」？咁又係，絲絲睇住身邊啲姪仔姪女去到某個歲數，都寧願佢哋凍齡，永遠維持可愛一面！

查實好多人同絲絲一樣都係睇住呢對星展金童玉女大，一年一年咁儲起佢哋嘅利是封，都儲咗成十年有多。依家佢哋大個仔大個女，都係時候可以出去搵錢。

上網放售有價有市

冇錯，阿「星」同阿「展」細細個就識搵錢（口架）喇！佢哋近年有價有市，絲絲就見過有人將佢哋嘅利是封放上網賣，十五蚊有八個包埋郵。今年唔知係咩價呢？儲齊十二年一套，個價會唔會再靚啲？

你都想帶佢哋返屋企？嗱！每間星展分行派利是封嘅日子都唔同，所以要留意番佢哋二月嘅公告，又或者直接問番自己位客戶經理啦。

余絲韻