港交所（00388）行政總裁李小加話今浪升市或較持久，話口完個市就插，恒指昨日跌304點報32,654點。係咪短期見頂？無疑是言之尚早，但睇見資金轉投「三桶油」同中國聯通（00762）等龍尾股，近排強勢股升得太多，炒家無古仔落鑊的情況十分明顯。
今浪升市火車頭內銀終於抖氣，「中農工建」四大行跌幅介乎1.8至3%，股王騰訊（00700）day low收，跌2.3%報458元，港交所亦跌2.7%報293元。另外，趁市旺伸手的國泰君安國際（01788），以每股2.85元批股集資近20億元，股價昨日重開上過3.17元高位，最低亦只係2.96元，最終收報3元跌2.9%。純睇走勢，感覺接貨者手瓜幾硬淨，企住批股價樓上仲係可以留意。
早幾日有項調查話香港連續八年蟬聯全球最惡頂樓市，中位數收入家庭要19.4年唔食唔用先上到車，遠遠拋離悉尼及溫哥華的12.9年及12.6年。老實講，全球大城市樓價商品化，四方八面資金湧入已是無法逆轉現象（除非學新西蘭咁唔畀外國人入市買現成物業趕客），打工仔買唔起居住地方的上車盤愈來愈普遍，怪只能怪全球央行濫印惹的禍。
其實計埋澳洲同加拿大薪酬稅率遠比香港高，如被喻為「萬稅國」加拿大，一出糧已經天一半地一半，高薪族貢獻半份薪水過政府，計稅後可支配收入，其實同香港樓價惡頂程度不相伯仲。
近排人仔強勢，折算港紙更見好使，加上內地樓市調控愈收愈緊，恐怕今年會助長更多北水落嚟掃樓。昨日幾隻手頭農地最多的本地地產股逆市做好，新鴻基地產（00016）升1.6%，恒基地產（00012）升1.2%，新世界發展（00017）升1.7%。
既然連獅隧口地皮都賣到2.8萬蚊一呎，預計未來落成每呎至少4萬至5萬元先有交易，幾隻新界大地主手上的麵粉價值應該有重估的必要，今年個市升咗2,700點，地產股只升得些少，短期一於睇番佢。
古勝